Қасиетті өлкеде

 Елбасымыздың халқына «Болашаққа бағдар: рухани жаңғыру» атты мақаласын жариялап, қазақстандықтарға терең ой салғандығы мәлім. Бұл бағдарламалық мақалада айқындалған міндеттерді жүзеге асыру мақсатында түрлі іс-шаралар ұйымдастырылуда. Елімізде саяси және қоғамдық сананың жаңғыру үдерісі бастау алғандығына байланысты «Этномәдени бірлестіктер мен өңірлік «Қоғамдық келісім» мекемелерінің рухани жаңғыру бағдарламасын жүзеге асыру бағытында 40-тан астам делегат ұлы ғалым, этнограф Шоқан Шыңғысұлының мәңгілік мекенге аттанған қасиетті жері Шанханай ауылдық округіне ат басын бұрды.

Қасиетті өлкеде өмірінің соңғы уақытын өткізіп, денесі осы жерге жерленген қазақтың ғұлама ғалымы, этнограф, өлкетанушы, суретші, 20 жасында-ақ көлемді зерттеулер жасап, құйрықты жұлдыздай ағып түскен, қазақ халқының маңдайына біткен біртуар азаматы Шоқан Шыңғысұлының бейіт басына барып, құран бағыштады.

Еліміздің түкпір-түкпірінен келген делегаттар Ш.Уәлиханов атындығы «Алтынемел» мемориалдық музейіне жол тартты.

Қадірлі қонақтарды ауданымыздың қазыналы қариялары, бетке ұстар азаматтары мен азаматшалары қарсы алды. Қонақтарымызға құрмет көрсетіліп, ата дәстүрімізге сай шашу шашып, аудандық Мәдениет үйінің көркемөнерпаздарының сүйемелдеуімен күмбірлеген күй ойналды. Аудан әкімінің орынбасары Болысбай Тоғысбайұлы өлкемізге келген азаматтарға қош келгендерін айтып, киелі жерімізде талай ғұламалардың тарихта таңбасы қалғандығын мақтанышпен жеткізді, солардың ішінде шоқтығы биік, «Аққан жұлдыз» атанған Шоқан Шыңғысұлы Уәлихановтың орыны ерекше екендігін айтты. Ассамблея мүшелері Шоқан Шыңғысұлының ескерткішіне тағзым етіп, гүл шоқтарын қойды.

Ш.Уәлиханов атындығы «Алтынемел» мемориялдық музейінің қызметкері Маржан Жакупбекова ескерткіштің ерекшеліктері мен оның орналасу маңыздылығы ескерілгендігі туралы, Шоқан Шыңғысұлының өмірбаянымен таныстырып, ата тегі мен туған-туыстары жайлы мәліметтер айтып, білім алған ордасын көрсетіп, сапарларда болған елді-мекендерді суреттеп, оның сырлас досы болған Достоевский екеуінің хаттарынан сыр шертіп, өткен  ғасырдың тарихымен сусындап, білгенімізді толықтырды, барлық экспонаттармен таныстырып, музейдің керемет архитектурасы туралы ақпарат берді.

Соңынан елімізге белгілі жазушы, журналист Жарылқап Бейсенбайұлы Ш.Уәлиханов атындағы «Алтынемел» мемориалдық музейіне «Шоқан Уәлиханов» атты еңбегін тарту етті. Сонымен қатар, ғұлама ғалымның өмірінен сыр шертіп, өмірінің соңында науқастанып өмірден өткенін айтты.

ҚР Президенті әкімшілігі Қазақстан халқы Ассамблеясы хатшылығының сектор меңгерушісі Нәзипа Ыдырысқызы ғалым Шоқан Шыңғысұлының еңбектері терең зерттеліп, жан-жақты жазылғандығын мәлімдеп, ол кісінің зерттеулері әлі күнге дейін өзінің құндылығын жоғалтпағандығын айтты. Сондай-ақ, халқымыздың қырғыз ағайындылардан бөлек ұлт екендігін дәлелдеп кеткендігін, артына қалдырған тарихи құнды мұраларынан сусындап, рухани құндылықтарымызды кең тануға мүмкіндік бар екендігін, ғалымның артында қалдырған шығармаларынан рухани байлық алуымыз керектігін мәлімдеді.

Әсерлі сұхбаттасудан соң естелік суретке түсіп, қонақтар өз ризашылығын білдіріп, біздермен қимай қоштасты.

Аңсаған АСАНҚЫЗЫ.