Жетісу облысында Құрбан айт мерекесін ұйымдастыру және өткізу

Құрбан айт мерекесін ұйымдастыру аясында аудан және қала аумақтарында қоғамдық қауіпсіздікті қамтамасыз ету және мүмкін болатын резонанстық жағдайлардың алдын алу мақсатында арнайы жоспар бекітіліп, жүйелі жұмыс жүргізілуде. Мал сату және союға арналған орындар анықталып, тұрғындар алдын ала хабардар етілді. Сонымен қатар, мал сою орындарында санитарлық-ветеринарлық талаптар мен өрт қауіпсіздігі ережелерінің сақталуы қатаң бақылауға алынған. Құрбан шалу тәртібі туралы ақпараттар әлеуметтік желілерде кеңінен таратылып жатыр.
Облыс аумағында Құрбан айт мерекесіне орай 14 ресми қасапхана белгіленген. Аудан және қала мешіттерінің бас имамдары арқылы құрбан шалу рәсімін өткізу кезінде ысырапшылдыққа жол бермеу, құрбандық шалудың фото және бейне түсірілімдерін әлеуметтік желілерде жарияламау, сондай-ақ айт дастарханының қарапайымдылығын сақтау бойынша түсіндіру жұмыстары жүргізілуде.
Мереке аясында құрбан шалу рәсімін онлайн форматта өткізу мүмкіндігі қарастырылған. Азаматтар qurban.muftyat.kz ресми сайты арқылы өз өңірін таңдап, құрбан шалуға өтініш бере алады. Сондай-ақ сайтта ет алу үшін өтініш қалдырып, құрбандық шалынғаны жөнінде есеп алуға болады. Барлық мәліметтер WhatsApp мессенджері арқылы жолданады.
Шалынған құрбандық Қазақстан мұсылмандары діни басқармасының ұйымдастыруымен, имамдар мен еріктілердің көмегі арқылы алдын ала тізімге енген мұқтаж отбасыларға жеткізілетін болады.