Жаңа Қазақстанның жарқын қадамы

Мемлекет басшысы Қасым-Жомарт Тоқаев Қазақстан халқына арнаған Жолдауында елдік мәселелерді жан-жақты қамтыды. Жолдауда көрсетілген саяси бағдар жаңашыл тың идеяларымен халықтың назарын аударды. Жолдауда көтерілген мәселелер: «Халықтың қолдауына ие болады», -деген ойдамын. Ең алдымен, еліміздегі жер мәселесіне кеңінен тоқталды. Игерілмей жатқан жерді қайтарып алу жөніндегі комиссия қызметіне тоқталып бүгінгі таңда 2,9 млн гектар жер мемлекетке қайтарылса, жыл соңына дейін кемінде 5 млн гектар жерді қайтару жоспарда тұрғанын айтып өтті. Сонымен қатар Президент еліміздегі арнайы экономикалық аймақтарды өркендетуге қатысты шараларды тізіп шығып, шет елдік инвесторларды тартудың тың жобасын ұсынып, озық технологияларды енгізіп, ел экономикасын өркендетудің бағытын көрсетті.

Халқымыз үшін қашанда білім саласы- басты назарда. Ғылым мен білімнің шырағын жаққанда ғана мемлекет дамып, болашақтың кепілі болған жастар әлемдік бәсекеге қабілетті тұлға ретінде қалыптасады. Мемлекет басшысы  білім саласы бойынша өз сөзінде: «Келесі маңызды мәселе- білім беру жүйесі туралы. Бұл сала ұлт сапасын жақсарту ісінде үлкен рөл атқарады. Қазақта «Ел боламын десең, бесігіңді түзе»- деген сөз бар. Сондықтан, мектепке дейінгі тәрбие жұмысы басты назарда болуы керек.  Алайда бізде 2 –ден 6 жасқа дейінгі балалардың жартысынан астамы ғана балабақшаға барады. Мұндай олқылыққа жол беруге болмайды»- деп баса айтты. Қазіргі егеменді еліміздің ағарту жүйесінің мақсаты-өркениетті елдермен деңгейлес дамуымызға мүмкіндік беретін оқу ағарту жүйесін қалыптастыру. Осы негізде білім беру жүйесінде жалпы азаматтық және ұлттық негізде жеке тұлғаны дамыту, қалыптастыру үшін қажетті жағдайлар жасалуда. Ғылым жетістіктерін пайдалануға, оқушылармен ұстаздардың шығармашылығын арттыруға мүмкіндік туып отыр. Осы орайда мемлекет басшысы өз жолдауында: «Орта білімнің сапасы – табысты ұлт болудың тағы бір маңызды шарты. Әрбір оқушының білім алып, жан-жақты дамуы үшін қолайлы жағдай жасалуға тиіс. Сол үшін «Жайлы мектеп» ұлттық жобасы қолға алынды. Біз 2025 жылға дейін 800 мың баланың  заманауи мектепте оқуына жағдай жасаймыз. Осылайша, апатты жағдайдағы және үш ауысыммен оқитын мектеп мәселесін толық шешеміз. Бұл ауыл және қала мектептерінің айырмашылығын едәуір азайтады». Міне, Жаңа Қазақстан құру ісіне мұғалімдердің рөлі айрықша екендігіне баса тоқталып, ұстаз мамандығының абырой-беделін арттыру үшін ауқымды жұмыс жасалып жатқанын атады.  Дегенмен де бұл бағытта әлі де біршама өзгерістер қажеттігін атап өтті.

Жолдауда айтылған осынау игі бастамаларымен қатар көптеген сала бойынша жүргізілетін реформалар алдағы уақытта өз жемісін береді деп сенеміз. Ол үшін, Мемлекет басшысы атап өткендей, әрбір қазақстандық білімді, еңбекқор әрі әділ болуға тиіс. Сонда ғана қуатты ұлтқа, экономикасы мықты, дамыған мемлекетке айналамыз.

Т. Құлыбеков атындағы орта мектеп

МДШО КММ директоры

Дидар Тұрарұлы Билибаев