САЙЛАУШЫЛАРМЕН КЕЗДЕСУ: ШАРУА ҚОЖАЛЫҚТАРЫНЫҢ МӘСЕЛЕЛЕРІ ТАЛҚЫЛАНДЫ

«AMANAT» партиясы Жетісу облыстық филиалының төрағасы, облыстық мәслихат депутаты Арыстанғали Арын Кербұлақ ауданына қарасты Сарыбұлақ ауылына жұмыс сапарымен барып, сайлаушылармен кездесті. Басқосуға шаруа қожалықтарының өкілдері қатысты.
Кездесу барысында халық қалаулысы партияның Жетісу облыстық филиалы тарапынан 2023–2026 жылдарға арналған сайлауалды бағдарлама аясында атқарылған жұмыстарды таныстырып, өңірде жүзеге асырылып жатқан жобалардың нәтижесіне тоқталды. Сонымен қатар, «Ауыл аманаты» және «Жер аманаты» партиялық жобаларының іске асу барысы кеңінен түсіндірілді.
Кездесудің негізгі мақсаты – тұрғындардың ұсыныс-пікірлерін тыңдап, шаруа қожалықтарының өзекті мәселелерін талқылау және оларды шешу жолдарын қарастыру болды. Жиын барысында ауыл шаруашылығын дамыту, инфрақұрылымды жаңғырту, жол сапасын жақсарту, ауыз су мәселесін шешу және мемлекеттік қолдау шараларын тиімді пайдалану мәселелері көтерілді.
Айта кету керек, «Жер аманаты» жобасы аясында Кербұлақ ауданында 55,6 мың гектар жер мемлекет меншігіне қайтарылған. Бұл ауыл шаруашылығы саласының әлеуетін арттыруға бағытталған маңызды қадам болып табылады.
Кездесу ашық форматта өтіп, көтерілген барлық мәселе назарға алынды. Арыстанғали Арын тұрғындардың өтініштері мен ұсыныстары партияның бақылауына алынатынын атап өтіп, оларды кезең-кезеңімен шешу бағытында тиісті жұмыстар жүргізілетінін жеткізді.
Сонымен қатар, жиын барысында өңірдің алдағы даму перспективалары, ауыл шаруашылығы саласын қолдау және жаңа жобаларды іске асыру мәселелері де талқыланды.