Жетісу облысындағы ЖРВИ мен тұмаудың эпидемиологиялық жағдайы

ЖРВИ, тұмау – ауа-тамшылы жолмен таралатын тыныс алу жолдарының  вирустық ауруы. Күзгі-қысқы маусымдық кезеңде жоғарылайды. Тұмау вирусы бүкіл әлемде кездеседі, эпидемия таратады.

Жетісу облысы бойынша 2025-2026жж. эпидмаусымда (40-12 апта аралығы) ЖРВИ-ң 139418 жағдайы тіркелді. Бүгінгі таңда ЖРВИ, тұмау бойынша облыстағы эпидемиологиялық жағдай тұрақты деп бағалануда, өткен жылмен салыстырғанда сырқаттанушылықтың 1,1 есеге жоғарылауы байқалады, бірақ қазіргі кезде сырқаттанушылық апта сайын төмендеуде, алдыңғы аптамен салыстырғанда сырқаттанушылық 2,4 есеге төмендеген.

14 жасқа дейінгі балалар сырқаттанушылықтың 66,9% құрайды.

Сырқаттанушылыққа күн және апта сайын мониторинг жүргізілуде. Жағдай бақылауда, тиісті алдын алу шаралары атқарылуда.

Зертханалық дәлелденген тұмау жұқпасының 220 жағдайы тіркелді (А(H3N2)). Тіркелген 220 тұмаудың ішінде 14 жасқа дейінгі балалар – 174 (79%), жүкті әйелдер – 6 (2,7%). 14 жасқа дейінгі 174 баланың ішінде сырқаттанған 1 жасқа дейінгі балалар – 22 (29,7%).

Тұмаудан басқа вирустардың басқа да түрлері айналымда бар: риновирус, парагрипп, бокавирус, РС вирус, короновирус.

Оқушылар арасында 15142 ЖРВИ, 60 тұмау тіркелді. Оқушылар арасындағы ЖРВИ, жалпы сырқаттанушылықтың 10,9% құрайды. Мектептерде оқушылардың сырқаттануы 10% аспайды. Мектептердегі сырқаттанушылық бойынша облыстық білім басқармасымен ақпарат алмасу жұмыстары жүргізілуде. Білім басқармасының мәліметімен мектептерде кабинеттік оқыту жүйесінің тоқтатылуы және онлайн оқуға кеткен сыныптар тіркелген жоқ.

Тұмаудың арнайы алдын алу жолы – иммундау. Иммундау бірінші кезекте қауіпті топтағы адамдарға жүргізілді: ұйымдасқан жабық мекемелердегі (балалар үйі, мүгедектер, қарттар үйі, мектеп-интернаттары) адамдар, жиі ауыратын иммунитеті төмен балалар, созылмалы аурулары бар ересектер, медициналық қызметкерлер, 2-3-триместрдегі жүкті әйелдер. 2025-2026жж. эпидемиялық маусымда жергілікті бюджеттен барлығы 82 000 доза тұмауға қарсы вакцина сатып алынды, бұл облыс халқының 12,3%-н қамтылды. Жергілікті бюджеттен жоспарланған 81201 адам 100% иммундаумен қамтылды.

Арнайы емес алдын алу шаралары да маңызды: дәрумендер пайдалану, тиімді тамақтану, жиі желдету, «ылғалды» тазарту, жеке бас гигиенасын сақтау (қолды жиі сабынмен жуу), түшкіріп-жөтелген кезде ауызды немесе мұрынды бет орамалмен жабу, петперде қолдану. Мүмкіндігінше халық тығыз орналасқан жерге бармаған дұрыс.

Асхат Чарапиев,

Жетісу облысы СЭБД басшысы.