ТАБИҒАТҚА ТАҒЗЫМ – ОРТАҚ МІНДЕТ

«AMANAT» партиясы Жетісу облыстық филиалының ұйымдастыруымен Наурызнама онкүндігі аясында «Таза Қазақстан» жалпыұлттық акциясы шеңберінде Ақсу өзені аумағындағы бұлақтар мен жағалауды тазартуға арналған «Мөлдір бұлақ» экологиялық шарасы өтті. Игі бастама табиғатты қорғау, экологиялық мәдениетті қалыптастыру және қоғамның қоршаған ортаға деген жауапкершілігін арттыру мақсатында ұйымдастырылды.
Ауқымды акцияға «AMANAT» партиясы Ақсу аудандық филиалының төрағасы Алма Құрманғалиева, Жетісу облыстық мәслихат депутаты Данияр Ахмолдаев, ауыл тұрғындары мен белсенді жастар қатысты. Қатысушылар өзен жағалауын тұрмыстық қалдықтардан тазалап қана қоймай, бұлақтардың көзін ашып, табиғи аумақтың тазалығы мен көркіне үлес қосты.
Іс-шара барысында экологиялық мәдениетті қалыптастыру, қоршаған ортаны қорғаудың маңыздылығы және табиғатқа жанашырлықпен қарау мәселелері кеңінен талқыланды. Белсенділердің айтуынша, мұндай акциялар қоғамның экологияға деген көзқарасын өзгертіп, жас ұрпаққа үлгі болады.
Жетісу облыстық мәслихат депутаты Данияр Ахмолдаев өз сөзінде Наурызнама онкүндігі аясында ұйымдастырылған шараның маңыздылығына тоқталып, табиғатты қорғау – әр азаматтың парызы екенін атап өтті:
«Наурызнама – тек мерекелік кезең ғана емес, игі істердің бастауы. Табиғат – біздің ортақ үйіміз. Оны қорғау тек бір күндік акциямен шектелмеуі тиіс. Әрбір азамат туған жердің тазалығына бейжай қарамай, күнделікті өмірде де экологиялық мәдениетті ұстануы қажет. Осындай игі шаралар қоғамда жауапкершілікті арттырып, қоршаған ортаға деген жанашырлықты қалыптастырады. “AMANAT” партиясының белсенділері бұлақтың көзін ашып, табиғатты қорғауға нақты үлес қосты», – деді ол.
Акция нәтижесінде Ақсу өзені аумағынан 1,5 тоннаға жуық қоқыс жиналып, арнайы орындарға шығарылды. Ұйымдастырушылар мұндай шаралардың алдағы уақытта да жалғасын табатынын атап өтті.