Қауіпсіздікке кешенді көзқарас: су тасқынының және өрттің алдын алу шаралары

Талдықорған қаласында су тасқынының алдын алу және өрт қауіпсіздігін қамтамасыз ету жұмыстары күшейтілді. Қалалық ТЖБ аға офицері Бауыржан Манасовтың айтуынша, Қаратал өзенінде 13 мың текше метр инертті материал қоры жасақталған. Негізгі күш перинаталдық орталық маңындағы жағалауды нығайтуға және қаладағы негізгі көпірлер арасындағы өзен арналарын тазартуға бағытталған. Осындай габион орнату жұмыстары Балықты өзенінде де жүргізілуде.
Сонымен қатар, құтқарушылар тұрғын үй секторындағы бақылауды күшейтті. Өрт санының 5,6%-ға төмендегеніне қарамастан, облыста өрт кезінде жарақаттану жағдайларының бес есеге өсуі тіркелді. Халықты, әсіресе әлеуметтік осал топтарды қорғау мақсатында 2463 газ датчигі орнатылды. Мамандардың айтуынша, қайғылы оқиғалардың негізгі себептері — пештердің ақаулығы мен электр сымдарындағы мәселелер. Осыған байланысты профилактикалық рейдтер күшейтілген режимде жалғасуда.