Конституция – мемлекет тұрақтылығының темірқазығы

Әрбір тәуелсіз мемлекеттің іргетасын бекемдейтін, құқықтық жүйесінің бағыт-бағдарын айқындайтын басты құжаты бар. Ол – Конституция. Конституция – мемлекеттің саяси, әлеуметтік, экономикалық дамуының стратегиялық өзегі, азамат пен билік арасындағы құқықтық келісім.

Қазақстан Республикасының қолданыстағы Конституциясы 1995 жылғы 30 тамызда бүкілхалықтық референдум арқылы қабылданды. Бұл күн – ел тарихындағы маңызды белес, себебі дәл осы құжат тәуелсіз Қазақстанның құқықтық негізін айқындап, жаңа мемлекеттік модельдің қалыптасуына жол ашты.

Конституцияда адам және оның өмірі, құқықтары мен бостандықтары ең қымбат қазына ретінде танылды. Бұл қағида – еліміздің демократиялық, зайырлы, құқықтық және әлеуметтік мемлекет ретіндегі басты ұстанымы. Негізгі заң билік тармақтарының бөлінуін, заң үстемдігін, сот тәуелсіздігін бекітіп, мемлекеттік басқару жүйесінің тұрақтылығын қамтамасыз етті. Уақыт талабына сай Конституцияға бірқатар өзгерістер мен толықтырулар енгізіліп келеді. Бұл – қоғамның дамуы мен саяси жаңғыру үдерісінің заңды көрінісі. Себебі Конституция  қатып қалған құжат емес, ол заман ағымына бейімделе отырып, ел мүддесіне қызмет етуі тиіс.

Конституцияның өміршеңдігі – оның қағидаларының нақты жүзеге асуында. Заң үстемдігі салтанат құрған жерде ғана әділет орнайды, ал әділет бар жерде тұрақтылық пен даму болады. Сондықтан Конституцияны құрметтеу – әрбір азаматтың парызы. Ол – мемлекетіміздің беріктігінің кепілі, болашаққа бастар айқын бағдар.