Жетісуда биыл 10 ірі әлеуметтік гранттық жоба іске асырылады

Жетісу облысында 2026 жылы мемлекеттік жастар саясатын, отбасы институтын және азаматтық белсенділікті дамытуға бағытталған ауқымды әлеуметтік жобалар кешені бастау алады. Үкіметтік емес ұйымдар арқылы жүзеге асырылатын бұл бастамалар өңір жастарының әлеуетін арттыруға, әлеуметтік мәселелердің алдын алуға және қоғамдық тұрақтылықты нығайтуға негізделген. Билік орындары бұл жобалардың тек уақытша шара емес, 2028 жылға дейінгі ұзақ мерзімді даму стратегиясының бір бөлігі екенін атап өтті.
Бағдарламаның ең басым бағыттарының бірі – ауыл жастарын қолдау және жұмыссыздықпен күрес. Жоба аясында жыл сайын 1 000-нан астам жас кәсіпкерлік негіздеріне оқытылып, үздік стартап иелеріне 3 миллион теңге көлемінде 10 қайтарымсыз грант беріледі. Өтінім қабылдау: қысқа мерзімді гранттар бойынша 15 жұмыс күні ішінде 3 мен 23 аралығында, ұзақ мерзімді гранттар бойынша 20 жұмыс күні ішінде 3 ақпан мен 2 наурыз аралығында https://cisc.kz/ru/projects/ сілтемесі арқылы беруге болады.
Жастардың бос уақытын тиімді ұйымдастыру мен шығармашылығын дамыту мақсатында «Мейірімді Жетісу» волонтерлік фронт-офисі мен «Жайдарман» ойындарына ерекше көңіл бөлінбек. Волонтерлік қозғалысқа кемінде 1 000 ерікті тартылып, өңірлік «Жыл волонтері» сыйлығы тағайындалса, жайдарманшылар арасында облыс әкімінің кубогы сарапқа салынады. Сонымен қатар, студенттік өзін-өзі басқару жүйесін жетілдіру арқылы оқу орындарында 30-дан астам тың жобаны жүзеге асыру жоспарланып отыр.
Бұл ретте қоғамдық қауіпсіздік пен салауатты өмір салтын насихаттау мәселесі де назардан тыс қалмады. Жастар арасында есірткінің алдын алу үшін арнайы Call-орталық пен сенім телефоны іске қосылып, ақпараттық науқандар арқылы 200 мыңнан астам адам қамтылады. Көшбасшылық қасиеттерді дамыту үшін 250 белсенді жас арнайы оқытудан өтіп, халықаралық жастар күніне орай өтетін «Көшбасшы» форумында марапатталатын болады.
Жобалардың тағы бір маңызды блогы отбасылық құндылықтар мен әйелдердің рөлін нығайтуға арналған. Әкелер институтын дамыту, аналар мен билер кеңестерімен кездесулер өткізу, сондай-ақ 500-ден астам әйел мен қызды қаржылық және құқықтық сауаттылыққа баулу шаралары көзделген. Бұл кешенді жұмыстар Жетісу облысының барлық 8 ауданы мен 2 қаласын қамтып, өңірдің әлеуметтік-демографиялық дамуына оң серпін береді деп күтілуде.