Жаса, қазақ, жаса Отаным – Қазақстан!

Біз қазақпыз…
Қазақпыз кең даланы ен жайлаған,
Мың өлсе де басынан бақ таймаған.
Таңы арайлап тамұқтай күн кешсе де,
Жанарда от, жүзінде нұр ойнаған.

Өр қазақпыз тарихы таң қаларлық,
Көк бөрідей тәңірден біз жаралдық.
Өркениеттер нәр алып кең даламнан,
Кіндігі ғылым-білім деп саналдық.

Біз қазақпыз, еліміз бар еңсесі өр,
Арқасы – құт, Алатау, Алтайы – төр.
Сақ, ғұндар мен көк түріктің жалғасымыз,
Ұрпағы ұлық, жаны дархан, бабасы ер.

Біз кімнен кем боламыз елім барда,
Қойнауында байлық толы жерім барда.
Бірлігі, берекесі бақ қондырған,
Дархан көңіл ақ дастархан төрім барда.

Жаса мәңгі, республикам ғажапстан,
Асыл мұра бізге жеткен алты арыстан.
Бар қазақтың маңдайдағы бақ жұлдызы,
Жаса, қазақ, жаса Отаным – Қазақстан!
Бүркітбай ФАЙЗОЛЛА