Құландар мекені

Өңірімізде туризм саласының дамуына үлкен көңіл бөлінуде. Облысымыздағы туризмнің ең перспективті түрлерін экологиялық, жағажай, мәдени, тау, су, спорттық туризм деп санауға болады. Солардың бірі, «Алтын Емел» мемлекеттік ұлттық табиғи паркі. 2024 жылдың қараша айының басында «Алтын Емел» мемлекеттік ұлттық табиғи паркінде «Құландардың мекені» атты фестиваль өтті. Фестивальдің мақсат – Қазақстанның Қызыл кітабына енген құландарды сақтап, санын арттыру және ұлттық парктің байлығын насихаттау. 1982 жылы «Алтын Емел» аумағына 23 бас құлан әкелінген. Бүгінде олардың саны – 3600 басқа жеткен. «Алтын Емел» ұлттық паркінің аумағы 307, 653 гектарды құрайды. Ұлттық парктің директоры Қуат Байтұрбаевтың айтуынша, мұндағы біраз құлан Іле Балқаш, Алтын дала, Созаққа жіберілген. Сондай-ақ, қар барысының саны 17-ні құрап отыр. Аю, қарақұйрық, елік, теке, арқар да ұлттық парктің сән-салтанаты. Құстардың 260 түрі кездеседі. Фестиваль аясында паркке 14 жол талғамайтын көлік берілді. Соңғы жылдары 14 мотоцикл, қайықтың бірнеше түрін жаңаланған екен. Ұлттық парктің табиғаты мен ондағы жануарларды тамашалау үшін туристер де көп келе бастаған. Биылдың өзінде Айғайқұм мен Ақтауды, Бесшатыр мен Қатутауды көруге 25 мың турист келген. Бұл күні «Құландар мекені» фестивалі Жетісудың тұмса табиғатын насихаттайтын айтулы шараға айналды. Данияр Тұрғанбаев, ҚР Экология және табиғи ресурстар министрлігінің комитет төрағасы алда атқарылар жұмыстар жайлы тілшілерге сұхбат берді. Фестиваль аясында ұлттық спорт түрлерінен жарыс ұйымдастырылып, эстрада жұлдыздары ән шырқады. Айғайқұмды көруге келген шетелдіктер де ауқымды шара үстінен түсіп, ыстық ықыласын жасыра алмады.

М. Рахатова