Қашықтан оқыту: Департамент белсенді жұмыс жүргізуде

    Қашықтан оқыту: Департамент белсенді жұмыс жүргізуде

       Наурыз айы биылғы жылы біздің елімізге елеулі өзгерістер алып келгені хақ. Қазақстан халқы  бір жағадан бас, бір жеңнен қол шығарып, тарихтың өзі кепіл болған бірліктің аясында барлық саланы жұмыла көтеруге атсалысты. Қазақстан Республикасы Білім және ғылым министрлігінің білім саласында бірқатар трансформациялық әдістерді қолданып, жедел шешім қабылдау әрекеттерімен қатар табандылық таныта алды. Баяндаудың бағыты — еліміздегі кәсіптік және техникалық білім беру мекемелерінің пандемия кезіндегі ахуалы. Коронавирустық инфекция пандемиясы әлем деңгейіндегі білім жүйесіне әсерін тигізді, Қазақстан Республикасы Білім және ғылым министрлігінің бұйрығымен көктемнің алғашқы айының 16 күнінен бастап кәсіптік және техникалық білім беру мекемелері қашықтық оқыту жүйесіне көшті. Аталмыш білім беру мекемелерінің әкімшілігі мен  педагогтері қашықтық оқытудың  өзекті мәселелерін және оңтайлы тұстарын қатар сезінді. Алматы облысының білім саласындағы сапаны қамтамасыз ету департаменті қызметкерлері ағымдағы жылдың 14 наурызда бастаған мониторингі және талдамалық нәтижелері аясында  Қазақстан Республикасы Білім және ғылым министрлігі мен колледж педагогтері арасында дәнекерлік жолымен бірыңғай жұмыс жүргізді.  

Алматы облысындағы 68 кәсіптік және техникалық білім беру мекемелері ұсынылған 8 платформаларға, оның ішінде «Edupage», «Platonus», «Google classroom», «Paragraph bilim», «Quizlet», «Edus», «Smart Qetisu», «Moodle»,  таңдаулы тұрғыда білім үрдісін көшірді.     

Интернет желісі баяу ауылдарда тұратын студенттерге Қазпошта арқылы білім беру материалдарын жеткізу қолға алынды, сонымен қатар педагог пен білім алушының кері байланысын жүзеге асыратын құралдардың бірі ретінде мобилдік қосымшалар белсенді іске қосылды. Пандемия жағдайында қашықтықтан білім берудің мән-жайын түгел назардан тыс қалдырмауға барынша көңіл бөлінді, бірінші кезекте  қажеттілік білдірген  білім алушыларға  колледждің  компьютерлік техникасы оқу мерзіміне берілді. Жатақханаларда қалған білім алушылар қашықтық оқыту бойынша тиісті техникалық құралдармен қамтылып, тамақтану жағдайлары да қарастырылды. 

Алматы облысының білім саласында сапаны қамтамасыз ету департаменті тарапынан платформаларға енгізілген білім беру үрдісін мониторингілеу жүргізілді. Қазақстан Республикасы Білім және ғылым министрлігі тарапынан сеніммен тапсырылған шараның басты мақсаты — қашықтық оқытуға көшуде кәсіптік және техникалық білім беру мекемелерінің әкімшілігі мен педагогтеріне қажетті жағдайда нормативтік  және әдістемелік тұрғыда кеңес беру.  Мониторинг нәтижелері қашықтан оқытуды ұйымдастыру жолындағы  бірқатар осал тұстарын айшықтады. Осы орайда, анықталған кемшіліктерді жойып, сапаны қамтамасыз ету бағытында консультациялық және түсіндіру жұмыстары жүргізілді, бірқатар колледжде электрондық оқу әдістемелік кешен толықтырылды, платформадағы электронды кітапхана жүйеге келтірілді, платформада қондырылған электронды журналдарын толтырып, жүргізілуі бойынша кеңес берілді, сабақ кестесін тиісті уақытында енгізу, берілген тапсырмалардың белгіленген мерзімде тексерудің маңыздылығы айтылды, ең бастысы, білім алушылармен платформа арқылы кері байланысты жандандырудың қажеттілігіне баса назар аударылды.

Десек те, әдістемелік-цифрлық тұрғыда кәсіптік және техникалық білім беру мекемелерінің аяулы ұстаздары жаңа мүмкіндіктерді бағындыруды қолға алды. 

Қашықтық режимінде оқитын білім алушы өз күнін нақты жоспарлау дағдысын меңгерсе, ал әрбір педагог білім алушының оқуға деген ынтасын арттырып, кері байланыс орната білсе, нұр үстіне нұр.  Міне, осы екі қағида берік ұсталса, қашықтық оқытудың сапасына да куә болатынымыз анық. 

Білім беру тақырыбын нақты, қысқа, дәл түсіндіріп, ақпарат жиынтығы анық, берілуі шұғыл дәріс — қашықтықтан білім беруде педагогтің бастапқы меңгеретін дағдысы болып тұр. Алдағы уақытта алатын тағы бір белес күтіп тұр, кәсіптік және техникалық білім беру мекемелеріндегі оқу жылын тәмамдайтын қорытынды аттестаттау жұмыстары да қашықтық форматта әзірленуде. Осы орайда, ұстаздардың ерең еңбектеріне қажымас қайрат пен  абыройлы нәтиже тілей отырып, биылғы түлеп шығатын маман иелеріне сәттілік пен ақ жол ниетін білдіреміз.

Рита Сайдгариева,

Алматы облысы 

Білім саласындағы сапаны

 қамтамасыз ету департаментінің 

бас маманы 

«Барлық келелі мәселені бірге шешетін боламыз!»

     С.Н. Кабимолдаева —   Алматы облысының              Білім саласында сапаны қамтамасыз ету 

  департаментінің басшысы

    2019 жылдың желтоқсан айында қабылданған «Педагог мәртебесі туралы» Заң (ары қарай-Заң) педагогтің мәртебесін айқындады және оның құқықтарын, әлеуметтік кепілдіктері мен шектеулерін, міндеттемелері мен жауапкершілігін белгіледі. Заңмен педагогтің құқықтық жағдайының сапалы жақсаруы, олардың әлеуметтік қорғауы кепілденді. 

    Қазақстан Республикасының президенті Қасым-Жомарт Кемелұлы Тоқаев 2019 жылғы педагогтердің Республикалық тамыз конференциясында білім және ғылым саласының дамуына еліміздің лайықты азаматтарын тәрбиелеуде білікті педагогтерге басты міндет артты. «Бәсекеге қабілеттілікті көтеру үшін педаготердің жоғары мәртебесіне сөз жүзінде қол жеткізуіміз керек». Президент Заңның 6 бабында көрсетілген педагогті оның кәсіби міндеттеріне байланысты емес жұмыс түрлеріне тартуға, Қазақстан Республикасының заңнамасында көзделмеген есептілікті не ақпаратты ұсынуды талап етуге, заңнамларда көзделмеген тексерулер жүргізуге байланысты шараларға жеке тоқталып өтті.

    Білім саласында сапаны қамтамасыз ету департаменті тек заңнама нормаларын бұзушылықтарды, оның ішінде педагогтердің кәсіби мінедеттерін атқару барысындағы құқықтарының сақталуына қатысты анықтап қана қоймай, өз ісіне салғырт қарайтын жұмыс берушілер мен басқа да кінәлі тұлғаларды әкімшілік жауапкершілікке тарта отырып, бұзушылықтардың алдын алуға бағытталған нақты шараларды жүзеге асыру үшін құрылған.

Қазақстан Үкіметі мен бүкіл қоғам үшін маңыздылығына қарамастан, педагог мәртебесі туралы заңдылық талаптарын орындамау Алматы облысы үшін өзекті мәселе болып тұр. Департаментке педагогтер, ата-аналар, азаматтар тарапынан білім саласындағы бұзушылықтарға байланысты өтініштер келіп түсуі жалғасуда. Алматы облысының мұғалімдерінен жасырын түрде алынған сауалнама қорытындысы бойынша «Педагог мәртебесі туралы» Заңды бұзушылықтар орын алатыны дәлелденді. «Қашықтықтан оқыту барысында есеп алуды тоқтату туралы министрдің бұйрығы орындалады ма?» деген сауалға сұралған педагогтердің 45% «жоқ» деген жауап берген, «Мектеп әкімшілігі өз қаражытыңызға газетке жазылуға мәжбүрлей ме?» деген сұраққа 86% педагог «иә» деп жауап берген. 

Сонымен қатар, құзіретті органдарға өтініш түсіру арқылы бұзушылықтарды болдырмауға талпынған педагогтерге білім беру ұйымы басшылары қысым көрсетеді: «Басшылық туындаған мәселелер туралы чатқа жазбауды талап етеді ма?», «Басшылық сұрақтар бойынша оң жауап беруді талап етеді ма?» деген сұрақтарғаа 70% мұғалім «иә» деп жауап берген.

Қазақстан Республикасының Білім және ғылым министрі А.Аймағамбетов Білім саласында сапаны қамтамасыз ету департаменттері алдына өз жұмыстарын бүгінгі коронавирус пандемиясы кезеңінде туындаған жаңа талаптарға сәйкес қалыптастыру туралы міндет қойды: «Бүгінгі күні азаматтардың барлық сындарлы сауалдарына жедел әрі тиімді әрекет ету маңызды». 

Алматы облысының Білім саласында сапаны қамтамасыз ету департаменті білім беру ұйымдарында қашықтықтан оқыту ұйымдастырылған кезеңнен бері білім саласына қатысты түскен сұрақтарға шұғыл жауап беру алгоритмін құрды. Біз күнделікті сайттарға, әлеуметтік желілерге, телефон арқылы және call-орталықтарына Алматы облысындағы білім саласына қатысты түскен ақпараттарды анықтаймыз.  Келеңсіз деректер және бұзушылықтар жергілікті атқарушы және мемлекеттік органдардың қатысуымен шұғыл түрде қарастырылып, көмек көрсету шаралары қолданылады. Департамент тарапынан қажет ететін отбасыларға компьютерлік техника берілу, интернетке қолжетімділік және оқыту бағдарламаларын пайдалану мәселелері бойынша нақты көмек көрсетілді. Педагогтер және ата-аналар арасында оқу бағдарламасының мазмұнынан бастап және  үй тапсырмасы, мектеп құрылысын жоспарлау және күрделі жұмыс жүргізуге дейінгі сұрақтар бойынша түсіндірме жұмыстарын жүргізу де маңызды болып есептеледі.

Департамент әлеуметтік жүйелерге, бұқаралық ақпарат құралдары беттеріне жарияланған ақпараттарға мониторинг жүргізу жұмыстарын жалғастыруда.

Педагогтер, оқушылар, ата-аналардың назарына: Сіздерде білім беру саласына және колледж, мектептердің қашықтықтан оқытылуына қатысты сұрақтар туындаса және мектеп әкімшілігінің есеп сұрағаны,  жоспраланбаған мониторинг және білім беру ұйымы әкімшілігі тарапынан тексеру жүргізілгені туралы фактілер бойынша ақпарат бергіңіз келсе, Алматы облысының Білім саласында сапаны қамтамасыз ету Департаментінің сайтына жолдауларыңызға Almoblcontrol.kz, сонымен қатар, 8(7282)24-79-91, 24-75-13; WhatsApp: 87015771142;  87022573790 телефондары арқылы хабарласуларыңызға болады

«Барлық келелі мәселені бірге шешетін боламыз!»