Табиғатты аялайық

Орман – ең алдымен адамның денсаулығына пайдалы. Демалыс үйлері, тынығу орындары ағаш арасына салынады. Ол жердің ауасы таза әрі шипалы. Ормандар болмаса, ғаламшарымыздағы оттегі адамдардың тыныс алуына жетпес еді.
Орманды алқаптарда орман қорғау шараларын тиянақты жүргізу үшін орман бірнеше телімдерге бөлінеді де, олардың әрқайсысы бір орманшыға бекітіледі. Орманшының жұмысына техникалық орман қорғау инженері басшылық етеді, бақылайды. Бұл салада өртке қарсы шаралардың мұқият орындалуы бақыланады. Орманды рұқсатсыз кеспеу, ағаш дайындаушылар мен пішен шабушылардың, малшылардың, т.б орман қорын сақтау ережелерін орындауы қадағаланады. Зиянды жәндіктер мен жануарлардың, өсімдік ауруларының пайда болуы бақыланып, қажет жағдайда тиісті мекемелерге тез хабарланады, күрес шаралары ұйымдастырылады. Орманда аң аулау, оның маусымдық ережелерін сақтау бақыланады.
Орман қорғау ісінде, орман шаруашылығында радиостанция, телефон болуы керек, өрт-химия станциялары құрылып, өрт сөндіру топтары ұйымдастырылды. Орман ұшақ, тікұшақтармен барланады. Шаруашылықта орман өнімін пайдаланбайтын бірден-бір сала жоқ. Орман, тоғай – баға жетпес табиғат қазынасы, халық байлығы. Сондықтан, табиғатты аялайық.
Қадыр БАЙЫМБЕТОВ,
Аралтөбе орман шаруашылығының орман шебері.