Мектеп – ауыл ажары

Қазақ поэзиясының ірі өкілдерінің бірі Мағжан Жұмабаев атамыз өзінің бір сөзінде: «Қазақтың тағдыры, келешекте ел болуы да мектебінің қандай негізде құрылуына барып тіреледі. Мектебімізді таза, берік һәм өз жанымызға /қазақ жанына/ үйлесетін негізде құра білсек, келешегіміз үшін тайынбай-ақ серттесуге болады» деген екен. Бұл сөздің астарында үлкен ой мен мән-мағына жатқанына ешкімнің таласы жоқ. Бұл жерде қаламға тұздық тақырып болып отырған мәселеге кеңінен тоқталып өтейін.
Сонау 1956 жылдары шамасында Ақбастау ауылының тұрғындары өздерінің (асар салуымен) демеушілігімен ауылға арналған шағын клуб тұрғызған екен. Кейіннен қолданыстан шығып қалғаннан кейін, мектеп балансына беріліп, мектептің мәжіліс залы болып келді.
Мектеп сол кезден бүгінгі таңға дейін жеңіл ақтау мен сырлау жұмыстарын жасап келді. Әбден тозығы жеткен ғимаратты қайта жөңдеуден өткізу үшін мектебіміздің директоры Қыстаубаев Әсет Бақытұлы, Жайнақ батыр ауылдық округінің әкімі Баядилов Асқар Оңғарұлымен бірлесе отырып, ауданымыздың әкімі Бигелдиев Махаббат Садуақасұлына клубтың жағдайын айтып, көмек қолын созуды сұраған болатын.
Өнер мен мәдениетке, білімге ерекше мән беретін аудан әкімі Бигелдиев Махаббат Садуақасұлы біздің бұл ұсынысымызды қабыл алып, «Өңірлік даму» бағдарламасы бойынша ауданымыздағы Ақбастау негізгі мектебіне күрделі жөндеу жұмыстары жүргізілді. Қажетті қаражат бөлініп, оны «SK CAPITAL STROY» ЖШС-нің директоры Сейтқазы Саянқазы Қадырқазыұлы жөндеу жұмыстарын жүргізуге тендер ұтып алды. Осы мердігерлік компания жұмыстарды уақытылы жүргізіп, оның екі бөлмесі технология кабинеті, екі бөлмесі кітапхана, 1 бөлмесі теннис залы және 2 бөлмесі медкабинет болып берілді. 300 шаршы метр мәжіліс залы. Соңғы замандық технологиямен жасалған мәжіліс залы оқушыларға қуаныш сыйлап, келген қонақтарымыздың көңілінен шығуда.
Мектеп директоры Қыстаубаев Әсет Бақытұлы жөндеу жұмыстарын жүргізген мердігер фирманың жұмысына ризалығын білдіріп:
— Биылғы жылға дейін бір қабатты бұл ғимарат апатты жағдайда еді. Енді міне, аудан әкімі Бигелдиев Махаббат Сәдуақасұлы қаражат бөліп, мектебіміз адам танымастай болып өзгерді. Бұл ең алдымен осы мектепте білім алатын оқушылардың қуанышына айналары сөзсіз, -деп өзінің зор тебіренісін жасырмады. Расында еліміз тəуелсіздік алғалы бері жөндеу көрмеген бұл клуб өңірлік бағдарламаның арқасында жаңарып сала берді.
Мектеп ұстаздары мен оқушыларына және ауыл тұрғындарына үлкен қуаныш сыйлаған аудан әкімі Махаббат Сәдуақасұлы Бигелдиевке зор алғысымызды білдіреміз. Әкім бол, халқыңа жақын бол деген сөз бекерге айтылмаса керек.
Гүлмира БӨЛЕКБАЕВА,
биология пәнінің мұғалімі,
Ақбастау негізгі мектебі КММ.