Әлемнің жарығын сыйладың сен маған…

жылдан
бері аталып келеді. Осыған орай таяуда аудан әкімдігі,
аудандық ішкі саясат бөлімі және аудандық Аналар
кеңесінің ұйымдастыруымен аудандық Ә.Сарыбаев
атындағы Мәдениет үйінде «Анаға тағзым» атты үлкен
мерекелік шара өтті.
Аналарға құрмет көрсету, жастарға отбасылық
құндылықтарды насихаттау мақсатында өткен шараға
Алматы облысының әр ауданынан келген Аналар кеңесінің
төрайымдары, ақ жаулықты әжелер, көп балалы жас аналар,
ауылдық округтердің аналар кеңесінің төрайымдары,
еңбегімен еленген әйел-аналар, ата-ана қамқорлығынсыз
қалған балаларды бауырына басып өсірген аналар қатысты.
Ауданымыздың аналарының тыныс-тіршілігінен көрме
ұйымдастырылып, Мәдениет үйінің ауласында қазақтың қара
қазанына бауырсақ пісіріліп, қазақы дастархан жайылды.
Алғашқы сөздің кезегін алған аудандық Аналар кеңесінің
төрайымы Ақбасова Ғалия Ниязқызы «Анаға тағзым» атты
баяндама жасады:
— Құрметті Аналар, шақырылған қонақтар, қадірлі қауым!
Бұл күннің тарихы тереңде жатыр. Себебі, бұл мереке
8-наурыздағы қыз-келіншектер күніндей емес, әртүрлі
себеппен ата-ана қамқорлығынсыз қалған баланы бауырына
басып өсірген ана-әжелерге арналған мейрам. Енді осы
мерекенің тарихына аздап тоқталып өтейін: Англияда ХVII-XIX
ғасырларда Ұлы пост кезінде бүкіл ел болып, Аналарға құрмет
көрсеткен екен. Викториялық кезеңде көптеген адам жұмыс
іздеп, өз отбасынан алыста жүретін болған. Оларға жылына бір
күн ғана демалыс берілген екен. Сол күні олар аналарына дала
гүлін теріп алып келген. Ал аналары болса, оларға арнап тәтті
күлше пісіріп, күтіп отыратын болған. Қазақта «Алтынның қолда
барда қадірі жоқ» деген сөз бар. Анамызға құрметті көзінің
тірісінде көрсетуіміз керек. Бұл үрдіс абзал аналарымыздың
бір сәт күнделікті күйбің тірлігін ұмытып, балаларының,
немерелерінің ыстық ықыласы мен шексіз сүйіспеншілігін
сезінетін күн болып, жалғасын таба берсе екен деп тілейміз!
Киелі Күреңбелде аттары тарихта қалған, елі үшін аянбай
еңбек еткен аналарымыз баршылық. Олар Еңбек Ерлері
— Зылиха Тамшыбаева мен Аябаева Мәриям апайымыз.
Осы өңірде қызмет еткен Сақауова Бәтима апайымыз. Осы
кісілердің ізін басып, еңбек еткен ауданымыздың бүгінгі
мақтанышы Мәшкенова Күлән Айманбайқызы. Жетім баланы
қанатының астына алып, оған орта білім алып беріп, ол
баланың барлық жағдайын жасап, ұядан ұшырған Исаева
Бәтима апайдың қамқорлығы ерлік емей немене?! Жетім
қалған қайын ағасының екі баласын қамқорлығына алған
сарыбастаулық жас ана Көдебаева Әйгерім Абайқызының
еңбегі ше?!
Қарттарға, жетім-жесірлерге қолдан келген көмектерін
аямай жүрген қоянкөздік Оспангазиева Рәш апайымыз,
сарыөзектік Әмреева Гүлсараға алғыстан басқа айтарымыз
жоқ,-деп, ауданымыздың көркеюіне елеулі үлес қосып, бүгінде
зейнеткерлікке шыққан бірқатар аяулы аналарымызды және
жақында Азия чемпионы атанып, еліміздің көк байрағын
Индонезияның астанасы Джакартада желбіреткен Ділдаш
Күрішпаеваның есімдерін атады.
Бұдан соң құттықтау сөз Қазақстан халықтары
Ассамблеясы жанындағы Алматы облыстық Аналар кеңесінің
төрайымы Баймадиева Жамал Қасымбекқызына берілді.
Ол: «Құрметті аналар, бүгінгі аналар мерекесі құтты болсын!
Алматы облысының он тоғыз ауданынан
Аналар кеңесінің төрайымдары
өздеріңізбен жүздесуге келіп отыр.
Қандай іс-шара болса да оның басында
әйел-ана жүреді. Алла өзінің қалаған
адамына бала береді дейді. Дүниеге
келейін деп тұрған сәбиден Алла Тағала:
«Мына жарық дүниеге аттанайын деп
отырсың. Маған қояр қандай сұрағың
бар?» десе, ол айтады екен: «Мен бұл
дүниені білмеймін ғой, мен ешқандай
тілді де білмеймін, сөйлей де білмеймін,
әуелі тамақтануды да білмеймін, мен
ол жақта қалай өмір сүремін? Және
ол жақта сұмдық соғыстар бар дейді,
қатыгез адамдар бар дейді, мені кім
қорғайды?» дегенде, Алла Тағала: «Ол жақта бір періште
бар. Саған барлық жағынан көмектеседі»
дейді. Сонда сәби: «Мен оның түрін де
білмеймін, тіпті атын да білмеймін ғой»
дегенде, Алла Тағала: «Ол періштенің
аты – Ана» деген екен. Алла Тағаланың
сүйген құлы – Ана. Сүйген құлы – қыз. Жас
отбасына бірінші перзентін қыз ғып береді
екен. «Ырыс алды — қыз» деген. Қызбала
– болашақ ана. Олар он сегіз сағат жұмыс
жасай алады екен. Бір мезетте бірнеше
жұмысты атқара алатын — әйелдер, ауырса
өзін-өзі емдеп алатын — әйелдер. Міне,
Алла Тағала біздерге осындай үлкен
сый-құрмет берген екен. Алланың сүйікті
құлы болған әйелдер қасиетті атқа лайық
болса екен. Өкшемізді басып келе жатқан
бойжеткендерге Алла Тағала жар бақытын,
ана бақытын сыйласа екен. Бәріңіз де
бақытты болсаңыздар екен. Аналар
кеңесінің, біздердің ең басты ойымыз да,
тілегіміз де — алдыңғы толқын алтын құрсақты апаларымыздың
жолын берсе екен. Бақытты ғұмыр кешіп, зейнетке шықса екен
деп, қателеспесе екен деп, қателессе – жол көрсетейік деп
еңбек етіп жүрген аналармыз. Алтын уақыттарыңызды бөліп,
алыстан ат арылтып келіп жатқан әр ауданның аналар кеңесінің
төрайымдарына алғыс айтамын. Бұл кісілер ешқандай айлық
алмаса да, еліміздің балалары мен аналарына деген ерекше
махаббаттарының арқасында еңбек етіп жүрген жандар…
Әйел-ана бақытты болуға лайық» деп, жиналғандарға рахметін
айтып, ризашылығын білдірді.
Құттықтау және марапаттау үшін сөз кезегін алған аудан
әкімінің орынбасары Болысбай Тоғысбайұлы Момбаев:
«Құрметті форумға қатысушы қонақтар, ақ жаулықты
асыл аналар! Елбасы Нұрсұлтан Әбішұлы Назарбаевтың
идеясымен Қазақстанда қыркүйек айының екінші жексенбісі
Аналар күні болып бекітілген. Адам өмірінде ананың рөлі
ерекше. Адамзаттың ана алдындағы парызы көп. Бұл күн —
Аналарымызды құрметтеу күні. 1912 жылы Аналар күнін кең
көлемде атап өту үшін Аналар күнінің халықаралық ассоциясы
құрылды. Осыған орай, біздің елде де үш-төрт жылдан бері
Аналар мерекесі ретінде атап өтіп келеміз… Ананы мадақтау
– адами құндылықты мадақтау. Заманның небір қиын-
қыстауында қиындыққа қайыспай, қарсы тұрып, табыстың
тайқазанын тасытып, еңбегімен еленген Кербұлақ ауданынан
шыққан жиырма бес Еңбек Ерінің қатарындағы Мәрия
Аябаева, Жамал Бекбосынова және Зылиха Тамшыбаева
апайларымыздың аттарын мақтанышпен айтамыз.
Ауданымызда мың бес жүз тоқсан бір Батыр ана бар, оның
ішінде «Алтын алқа» иегерлері сегіз жүз тоқсан алты болса,
«Күміс алқа» иегерлері алты жүз тоқсан бес. Бүгінгі күні 35 жас
шамасындағы «Алтын», «Күміс» алқалармен марапатталғандар
— Көксу ауылдық округінен Ералы Назым, Қарашоқы ауыл
округінен Қалиева Динара, Қызылжар ауылдық округінен
Болғамбаева Ләззат және Бұхарбаева Мәдина. Мұның өзін —
ұрпақ жалғастығы мен дәстүр сабақтастығы деп білуіміз қажет.
Осынау тамаша мерекеде Сіздерге дүниенің бар жақсылығын,
деннің саулығы мен көңілдің шуағын тілеймін!» деп, бірқатар
аналарды марапаттады. Атап айтсақ, Күлән Мәшкенова,
Ділдаш Күрішпаева, Айкерім Көдебаева, Бәтима Исаева, Күміс
Исенбаева, Дина Ақбасова, Ажар Сыдық, Еркежан Тоқабаева,
Күлсара Әміреева, Ләйлә Сарыбаева.
Бұдан соң Қарасай аудандық Аналар кеңесінің төрайымы
Бекбаева Акылия Бекбайқызы, Сарқан аудандық аналар
кеңесінің төрайымы Қалиева Күлшарбан Мырзабайқызы және
ауданымыздың Құрметті азаматы Күлән Айманбайқызы бүгінгі
өткен аналар мерекесінің жоғары деңгейде өткенін, кейінгі
ұрпаққа үлгі боларлық, сабақ аларлық шара болғанын айтып,
ұйымдастырушыларға ризашылықтарын білдірді.
Мерекелік шарада Айдана Жұмабекова «Абзал ана»,
Сәуле Қожаханова «Бұлбұл», Айдана Мұсағұлова «Бақытты
әйел», Гүлмира Өтегенова «Анашым» әндерін тамылжыта
шырқады. Қоғалы ауылдық аналар кеңесінің төрайымы,
зейнеткер-спортшы Айша Сүттібаева немересі, Панфилов
атындағы орта мектептің 4-сынып оқушысы Алтынай Асхатпен
акробатикалық этюд көрсетті. Сондай-ақ, жазушы-драматург,
Орта Азия халықаралық сыйлығының лауреаты Лидия
Егенбердиева «Ана жүрегі» монологін оқыды.
Айналдым ана деген асыл аттан,
Шуағын бар әлемге шашыратқан.
Ойнап жүрген құлынын даладағы
Үйде отырып, даусынан ажыратқан,-деп ақын
жырлағандай, ана есімі қашанда ардақты. Аяулы
аналарға арналған мереке Азамат Үмбетов пен Мәулеш
Әбжапаровтың орындауындағы «Ана туралы жыр» әнімен
аяқталды.
Айнаш ҚАСЕНОВА.