Алпыс жыл өткен соң…

Таяуда 1959 жылғы №49 орта мектептің түлектері, (сол жылдары мектептің атауы №19, №270 аталған) ауданымызға арнайы ат басын бұрды. Атап айтсақ 1965 жылы бұрынғы КАЗПИ Абай атындағы білім шаңырағының физика-математика факультетін бітірген Кеңес Сағынайұлы, Павлодар облыстық адвокаттар алқасы төралқасының төрағасы Золотов Владимир Констанинович, ғылыми – зерттеу университетінің құқықтық саясат және конституциялық заңнама орталығының директоры, заң ғылымдарының докторы, «Право и государство» журналының бас редакторы Ударцев Сергей Федорович келді.
Кеңес Сағынайұлы жоғарғы оқу бітірген соң, №49 орта мектепке мұғалім болып орналасты. Кейін директорлық қызмет атқарды. Сондай-ақ, аудандық партия комитетінде үгіт насихат бөлімін басқарды. Жоламан орта мектебінде директорлық қызмет атқарған. Қазіргі уақытта зейнеткерлікте, алайда зейнеткерлікте болса да түлектерге математика пәнінен жоғарғы оқу орындарына дайындық жүргізеді. 2003-2018 жылдары аралығында 58 алтын белгі дайындаған. ММУ-дың физика-математика мамандығын екі шәкірті аяқтаған. Қазіргі уақытта Кеңес Сағынайұлының шәкірті Асқар Ыбраев физика-математика ғылымының докторы. Жалпы 20-дан аса математика пәнінің мұғалімдері жұмыс атқарады. Кеңес Сағынайұлының дайындаған шәкірттері Испанияда, Кореяда, Мәскеуде өздерінің сүйікті жұмыстарымен айналысуда. Түлектер өздері оқыған мектепті түгелдей аралап шығып, оқушылармен сол мектепте өткен қызықты оқиғаларымен бөлісті. Кеңес Сағынайұлы сөз тізгінін алып:
— Бұл мектеп — біз үшін сан түрлі мектептердің ішіндегі ең үздігі. Мектеп — екінші үйіміз, мұғалімдер екінші анамыздай болған. Сол сияқты құрметті оқушылар сіздер де мектепті өз үйлерңіздей жақсы көріп, ұстаздарыңызды өз аналарыңыздай сыйлауларыңыз тиіс. «Мектеп — кеме білім — теңіз» демекші, күнделікті кемелеріңізге келіп, теңіздей білімді бойларыңызға сіңірулеріңіз тиіс. Сол алған біліммен жоғары оқуға түсіп, биік белестерді бағындыруларыңызға тілектеспін. Барлықтарыңыз біз секілді 60 жылдан кейін осы мектептің түлектері едік деп келіп отырыңыздар,- деп ақ тілегін жеткізді.
Павлодар облыстық адвокаттар алқасы төралқасының төрағасы Золотов Владимир Константинович, ғылыми-зерттеу университетінің құқықтық саясат және конститутциялық заңнама орталығының директоры, заң ғылымдарының докторы, «Право и государство» журналының бас редакторы Ударцев Сергей Федорович ақ тілектерін білдіріп, №49 орта мектептің директоры Қожабергенова Айман Мэлісқызына «Дети полустанков» және басқа да кітаптармен қатар қабырға суретін сыйға тартып, естелікке суретке түсті.
№49 орта мектептің директоры Қожабергенова Айман Мэлісқызы келген түлектерге рахметін айтып, ақ тілегін жеткізді. Кездесу соңы №49 орта мектептің оқушыларының арнайы дайындалған концертіне ұласты.
Дидар ДИХАНБАЕВ