Олқылықтардың орны толықтырылуы тиіс

Таяуда аудан әкімдігі ғимаратының мәжіліс залында аудан әкімдігінің алқа мәжілісі болып өтті. Аудан әкімі.М.С.Бигелдиев мәжілісті ашып, күн тәртібімен таныстырып, жұмыстың тәртібі мен регламентін бекітті. Күн тәртібіндегі «2018 жылдың І — жарты жылдығындағы Кербұлақ ауданның әлеуметтік-экономикалық дамуының қорытындылары мен IІІ — тоқсанға міндеттері туралы» аудандық экономика және бюджеттік жоспарлау бөлімінің басшысы Төлегенов Шалқыбай Молдахметұлы баяндама жасады. Баяндамашы аудан әкімдігінің атқарушы органдарының экономика салаларында өсім серпінін сақтау жөнінде нақты жұмыстар атқарылғандығы атап өтті.
-Ауданда 19 орта және кіші кәсіпорындар өнеркәсіп саласында жұмыс істеуде. Өнеркәсіп өндірісінің көлемі 2017 жылдың 6-айында 1 млрд 639 млн. теңгені құраса, ағымдағы жылы 939 млн. теңгені құрап нақты көлем индексі 102,6% құрады. Ауылшаруашылығы өнімінің жалпы көлемі 7 млрд. 359 млн. теңгені құрады, нақты көлем индексі 103,2%. 2018 жылға жоспарланған 4-ауылшаруашылығы кооперативінің орнына 88-жеке қосалқы шаруашылықтарын тарта отырып, Қоғалы өңірінен сүт дайындайтын «Рассвет Агро» ауылшаруашылығы коопертиві құрылды,-деп атап көрсеткен баяндамашы электрондық карта туралы айтып, ауданның орташа көрсеткішін төмен тартып отырған ауылдық округтарға тоқталды. «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған» бағдарламасы бойынша, міндетті медициналық сақтандыруға қатысатындардың көпшілігінің мәртебесінің анықталмағандығы туралы айта отырып, өзектендіру бойынша Сарыөзек а/о 28% , Қызылжар 33%, Шанханай 29%, Талдыбұлақ 28%, Шұбар 26%, Көксу ауылдық округі 31 пайыз болып, ауданның орташа көрсеткішіне әсер етіп отырғандығын жеткізді. Бөлшек тауар айналымының көлемі, негізгі капиталға тартылған инвестициялар, құрылыс жұмыстарының көлемі, ҰБТ орташа көрсеткіші туралы , бюджетке түскен салық, аудандағы медициналық қызмет, ана мен бала өлімі және қылмыс бойынша деректер келтіріп, ауданның жеткен жетістіктері мен кеткен кемшіліктеріне тоқталып, әр сала бойынша атқарылған шараларды нақты көрсеткіштерімен баяндады.
Алқа мәжілісінде аудандық кәсіпкерлік бөлімінің басшысы Рысбеков Әділхан Сейілханұлы, аудандық тұрғын үй -коммуналдық шаруашылық және тұрғын үй инспекциясы бөлімінің басшысы Қатшыбеков Бауыржан Нұрахымұлы, Сарыөзек ауылдық округінің әкімі Тұрсынбаев Батырхан Ешметұлы, Қоғалы ауылдық округінің әкімі Исабаев Самат Сәмиұлы өздері басшылық етіп отырған сала бойынша атқарылған жұмыстары туралы баяндама жасады.
Аудан әкімі Махаббат Бигелдиев ауданның әлеуметтік-экономикалық дамуындағы жеткен жетітіктермен қатар кемшіліктер орын алғандығын айтып, оларға жеке-жеке тоқталып, ауылдық округ әкімдеріне, мекеме басшыларына тапсырмалар берді:
«Кербұлақ ауданының ауыл шаруашылығы бөлімі» ММ , ауылдық округ әкімдеріне:
— 3-ші тоқсанда жоспарға сәйкес, қосымша 3 ауылшаруашылығы кооперативін құруды, егістік алқаптарын электрондық картаға енгізу жұмыстарын қатаң бақылауға алып, жұмыстарды жандандыруды, астық ору науқанының басталуына орай, техникалық қауіпсіздік ережелерін сақтап, алқаптағы дәнді- дақылдарды жинау жұмыстарын тиісті деңгейде жүргізуді,
— 2018-2019 жылдарға қыс мезгіліне қажетті мал азығының 1,5 жылдық қорын жасақтауды, Басши ауылдық округіндегі «Қасымбек», «Дәнекер», Жайнақ батыр ауылдық округіндегі «Жаманбұлақ» су тоспаларының жерге орналастыру құжаттары мен мемлекеттік актілерін дайындап, әділет басқармасына тіркеуге өткізуді, айналымнан шығып қалған суармалы алқапты қалпына келтіру мақсатында, 100-шақырым су құбырларын облыстық су шаруашылығы басқармасының теңгеріміне өткізіп беруді аяқтауды, «Тауарлы сүт фермасын құру», бағдарламасының барлық тетіктерін пайдалана отырып, ауыл шаруашылығы тауар өндірушілеріне қолдау көрсетуді, ет экпорттау бойынша тиісті жұмыстар жүргізуді тапсырды.
«Кербұлақ ауданының кәсіпкерлік бөлімі»ММ, ауылдық округі әкімдеріне:
— «Бизнестің Жол картасы-2020» бағдарламасы аясында, кәсіпкерлерге несие алуға жан-жақты қолдау көрсетуді, ауданның негізгі капиталына инвестицияның тартылуын жандандырып, кемшіліктерді жоюды, әлеуметтік маңызы бар азық-түлік тауарларының бағасының тұрақтылығын үнемі бақылауда ұстауды, отандық және шетелдік инвесторлар ұсынған жобаларды жүзеге асыруды қамтамасыз етуді, әлеуметтік маңызы бар азық-түлік өнімдерін өндірушілермен және жеткізушілермен жасалған меморандумдардың талаптарын сақтау жөніндегі бірлескен жұмысты жалғастыруды тапсырды.
«Кербұлақ ауданының құрылыс бөлімі» ММ, ауылдық округі әкімдеріне:
-«Өңірлерді дамыту-2020» бағдарламасымен көзделген объектілерді қолданысқа енгізуді және бөлінген бюджет қаражаттарын игеруді, ауылдық округте бойынша анықталған кемшіліктерді жоюды,
апатты жағдайдағы әлеуметтік, бюджеттік нысандардың жобалық-сметалық құжаттарын әзірлеп, 2019 жылдың бюджетіне ұсынуды, Сарыбұлақ,
Ы.Алтынсарин, П. Дутов, №49, И.Панфилов, Сарыбастау орта мектептерінің күрделі жөндеу жұмыстарын жүргізу үшін, жобалық-сметалық құжаттарын сараптамадан өткізіп, 2019 жылдың бюджетіне ұсынуды, Қоғалы ауылдық округінің әкімдік ғимаратын күрделі жөндеуге қаржы бөлінуіне байланысты, заңға сәйкес мемлекеттік сатып алу конкурсын өткізіп, құрылыс-монтаж жұмыстарын жүргізуді, 250 орындық поликлиника құрылысының жобалық-сметалық құжаттары ағымдағы жылы аяқтап, 2019 жылдың бюджетіне ұсынуды тапсырды..
«Кербұлақ ауданының білім бөлімі» ММ (З.Кұтпанбаеваға):
— мектептерде жаңа ақпараттық технологияларды толыққанды пайдаланып, мұғалімдердің сапалық құрамын жақсартып, олардың біліктілігін арттыру арқылы білім сапасын көтеру шараларын қабылдап, білім объектілеріне жөндеу жұмыстарын өткізуді қамтамасыз етуді, кәмелеттік жасқа толмаған жасөспірімдер тарапынан құқық бұзушылықтың алдын алу мақсатында, профилактикалық жұмыстарды жүргізуді, аудан бойынша мектептерді жоғары жылдамдықтағы интернет желісіне қосу бойынша жұмыстарды қолға алуды тапсырды.
«Кербұлақ ауданының қаржы бөлімі» ММ, ауылдық округі әкімдеріне:
— «Шұбар Агро» жауапкершілігі шектеулі серіктестігінің теңгеріміндегі 80-орындық бұрынғы темір жол емханасын сатып алып, ауданның коммуналдық меншігіне қоюды жүзеге асыруды, Қарашоқы ауылындағы өнер мектебін жеке меншіктен сатып алып, ауылдық округ әкімінің коммуналдық меншігіне қоюды бақылауға алуды тапсырды
«Кербұлақ аудандық мемлекеттік кірістер басқармасы», ауылдық округ әкімдеріне:
— жергілікті бюджетке түсетін салықтар мен міндетті төлемдердің кемуіне жол бермеуді, салық базасын ұлғайту және берешек сомаларын азайту бойынша жұмысты күшейтіп, оның өсуіне жол бермеу үшін шаралар қабылдауды, кемшіліктері анықталған ауылдық округтермен бірлесе жұмыстар жүргізуді тапсырды.
«Кербұлақ ауданының тұрғын үй -коммуналдық шаруашылық және тұрғын үй инспекциясы бөлімі» ММ және ауылдық округі әкімдеріне:
— 2018-2019 жылдардағы жылу беру маусымына дайындық жұмыстарын жүргізуді, сумен қамту объектілерінің құрылысы мен қайта жаңғырту жұмыстарын белгіленген мерзімде аяқтауды, сондай-ақ 2018 жылға бөлінген қаражатты толық игерілуді қатаң бақылауға алуды, сумен қамту объектілерінің құрылысы мен қайта жаңғырту жұмысының жобаларын ағымдағы жылы пысықтап, бюджеттік ұсыным беруді, Сарыөзек ауылын сумен жабдықтау (4-ші кезең) жұмысының жобасын аяқтап, 2019 жылдың бюджетіне ұсынуды, Сарыөзек, Қарашоқы, Жайнақ батыр, Көксу ауылдық округтерінің түнгі жарықтандыру бойынша жұмыс жобаларын аяқтап, 2019 жылдың бюджетіне ұсынуды қамтамасыз етуді, Жоламан қиыршық тас зауытының теңгеріміндегі 256 пәтерлі 4 үйді ауданның коммуналдық меншігіне өтукізуді өте қысқа мерзімде аяқтап, күрделі жөндеу жұмыстарына 2019 жылдың бюджетіне ұсынуды тапсырды.
«Кербұлақ ауданының жолаушылар көлігі және автокөлік жолдары бөлімі»ММ, ауылдық округі әкімдеріне:
— аудан бойынша ішкі көше жолдарына жүргізіліп жатқан орташа жөндеу жұмыстарының сапалы аяқталуын бақылауда ұстауды, Шанханай ауылына баратын 17-шақырым және Сарыбұлақ ауылына баратын 12-шақырым кірме жолдардың күрделі жөндеу жұмыстарын жүргізуге жобалау жұмыстарынағымдағы жылы аяқтап, 2019 жылдың бюджетіне ұсынуды қамтамасыз етуді тапсырды.
«Кербұлақ ауданы әкімдігінің халықты жұмыспен қамту орталығы» коммуналдық мемлекеттік мекемесінің директорына:
— «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған» бағдарламасының аясында жаңа жұмыс орындарын ашу жоспары толығымен орындалып, нысаналы топтағы адамдарды жұмысқа орналастыруды бақылауда ұстауды, міндетті медициналық сақтандыру бойынша жоспарға сәйкес өзектендіру жұмыстарын жандандыруды тапсырды.
«Кербұлақ ауданының орталық ауруханасына»:
— өткізетін скринингтердің сапасын жақсарту жұмыстарын жалғастыруды, нәресте шетінеуі мен ана өлімінің өсуіне жол бермеу шараларын қабылдап, әрбір нақты жағдайды егжей-тегжейлі талдап, тиісті шаралар қабылдауды, ауылдық денсаулық сақтау саласына мамандарды тарту жұмысын жандандыруды, денсаулық сақтау объектілеріне жөндеу жұмыстарын жүргізуді қамтамасыз етуді,тұрғындарға көрсетілген медициналық қызметтер деңгейін арттыру және сапасын жақсарту бағытында дәрігердің біліктілігін арттыру жоспарын орындауды тапсырды.
«Кербұлақ аудандық ішкі істер бөлімі», «Жергілікті полиция қызметі», ауылдық округ әкімдеріне:
— ауылдық полиция инспекторлары өздеріне қарасты елді-мекендерде қылмыстың алдын алу бойынша әлеуметтік әр топтағы тұрғындармен профилактикалық жұмыстарды жүргізуді, құқық бұзушылықтардың алдын алуды, қылмыстар және жол-көлік оқиғаларының санын азайту жөнінде алдын алу жұмыстарын күшейтуді, қылмыстар мен жол көлік апаттарының санын азайту мақсатында сақтандыру шараларын күшейтуді тапсырды.
Аудандық басқармалар, бөлім басшылары, ауылдық округ әкімдеріне:
— Елбасының «Төртінші өнеркәсіптік революция жағдайындағы дамудың жаңа мүмкіндіктері» атты Жолдауын, Қазақстан Республикасы Парламенті қос палатасының бірлескен отырысында «Президенттің бес әлеуметтік бастамасы» атты халыққа үндеуінің орындалуын басшылыққа ала отырып, Кербұлақ ауданының экономикалық және әлеуметтік тұрақтылықты қамтамасыз ету жөніндегі іс-әрекеттердің дағдарысқа қарсы жоспарын жүзеге асыруды қамтамасыз ету жұмыстарын жалғастыруды, экономиканың жоспарлы -өсімін қамтамасыз ету үшін қолда бар барлық қорларды барынша пайдалануды, мемлекеттік салалық бағдарламалардың және ауданның 2018 жылға арналған даму бағдарламасының нысаналы индикаторларын сапалы және уақытында орындауды, жүзеге асырылатын мемлекеттік және салалық бағдарламалар аясында мүмкін болатын мемлекеттік қолдау құралдары туралы кең ауқымды түсіндіру жұмыстарын үнемі жүргізуді, бюджет қаражатын тиімді, нысаналы және уақытында игеру жұмыстарын жандандыруды, жергілікті атқарушы органдар қызметінің тиімділігін арттыру жұмыстарын күшейту жөнінде ауылдық округ әкімдері мен мекеме басшыларына, жауапты мамандарға тапсырмалар берді.
— Ауылдық округ әкімдері Қазақстан Республикасы Парламенті қос палатасының бірлескен отырысында «Президенттің бес әлеуметтік бастамасы» атты халыққа үндеуі бойынша қандай жұмыстар жасағандықтарыңыз туралы есеп бересіздер,- деп ескерткен аудан әкімі әркім өзі атқарып отырған жұмысына жауапкершілікпен қарап, тыңғылықты іс істегенде ғана аталған олқылықтардың орнын толтырып, кемшіліктерді жоюға болатынын айтып, жауапкершілікпен жұмыс істеуге шақырды.
Күн тәртібіндегі қаралған мәселелер бойынша қаулы қабылданып, аудан әкімі Махаббат Бигелдиев әкімдіктің алқа мәжілісін қорытындылады.
Өз тілшіміз.