Пробация қызметінің маңыздылығы

Жуырда аудан әкімінің орынбасары Болысбай Тоғысбайұлы Момбаев, Кербұлақ ауданы прокуратурасының прокуроры Төребеков Айдын Болатұлы, жұмыспен қамту орталығының басшысы Құрманбаев Мұхит Айтқұрманұлы, аудандық пробация қызметінің бастығы Асан Бейбітұлының қатысуымен шартты түрде сотталушыларға пробация жайлы түсініктер берілді. Аудан әкімінің орынбасары Болысбай Тоғысбайұлы:

— Пробация жайлы айтар болсақ, бұл қызметтің мақсаты — шартты түрде бас бостандығынан айырылған азаматтарға әлеуметтік-құқықтық қызмет көрсету, істі болған жандарды бас бостандығынан айырмай, жазаға тарту болса, пробация осы бағытқа дәл келеді. Пробацияның жалпы қызметі шартты түрде сотталғандар немесе белгілі бір кезеңде жазасын өтеп келушілерге психологиялық көмек, құжаттану, білім беріп, кәсіп меңгертіп, жұмысқа орналасуына, ауырып қалған жағдайда дәрігерлік көмек көрсетеді. Қазіргі уақытта ауданымызда шартты түрде сотталған, жазасын өтеп келген 57 адам тізімде тұр. Біз осы жандарға жұмыспен қамту орталығы, аудан прокуратурасы бірігіп, әрқайсысына жеке талдау жасап, әлеуметтік көмек жасауымыз тиіс, — деді.
Кербұлақ ауданы прокуратурасының прокуроры Төребеков Айдын Болатұлы сөз тізгінін алып: «Жалпы тізімдегі 57 адамның 47-сінің нақты жұмысы бар. Қалған 10 адамды тұрақты жұмысқа орналастыруымыз керек. Жаңадан ашылған «АлаЦем» зауытына, Қоғалы ауылдық окуругінің жолы күрделі жөндеуден өтіп жатыр, сол кісілердің жұмыс орындарына арнайы барып қалған 10 адамды жұмысқа орналастыруымыз қажет. Сондай-ақ, денсаулықтарына қатты көңіл бөлуіміз керек. Бұл кісілер жылына бір уақыт рентгеннен өтіп, толықтай міндетті түрде тексерілуі тиіс. Кешкі сағат 21:00-ден кейін арнайы рейд жүргізілуі тиіс. Сіздер ештеңеге мойымай, алға ұмтылыңыздар. Өмір осымен тоқтап қалған жоқ, үш айлық курсты оқуға, жеті пайызбен жиырма бес жылға дейін баспана алуға толықтай құқыларыңыз бар. Барлық мекеме ауызбірлікте жұмыс жасап, бір-бірімізбен тығыз байланыста болып, барлықтарымыз бірлесе жұмыс істейік, жасаған қателіктеріңізді қайталамаңыздар, — деп сөзін аяқтап, жиынды қорытындылады.
Дидар ДИХАНБАЕВ.