Толағай

Таяуда «Нұр Отан» партиясы аудандық филиалының желілік кестесіне сәйкес, аталмыш филиалдың және «Сарыөзек» бастауыш партия ұйымының ұйымдастыруымен Д.Қонаев атындағы орта мектебінің спорт залында «Бақытты отбасы — бақытты балалық шақ» жобасы аясында «Толағай» отбасылық спорт жарысы өтті. Жарысқа Сарыөзек аулының мектептерінен 4 құрама команда қатысты. Атап айтсақ, №49 орта мектебінен Есенқұловтар отбасы, Күреңбел қазақ орта мектебінен Кабиевтер отбасы, Д.Қонаев орта мектебінен Нұрлыбаевтар отбасы және Сарыөзек орта мектебінен Молдабековтер отбасы атсалысты.

«Сарыөзек» БПҰ төрағасының орынбасары Төлегенова Ләйля Жауымбайқызы, «Нұр Отан» партиясы аудандық филиалының эксперті Қуанышева Айгүл Жұмаділқызы, «Ай-сана» балабақшасының меңгерушісі Дәулетбекова Жаңагүл Абдулдақызы,  аудандық «Кербұлақ жұлдызы» газетінің тілшісі Диханбаев Дидар Асқарұлы жарыстың әділ бағасын  берді. Жарыс мынадай: таныстыру, эстафеталық жарыс,  дартц, қаппен секіріп жүгіру, арқан тартыс сынды бөлімдерден тұрды.

Әр отбасы кезеңдерден  сүрінбей өтуге барынша тырысып бақты. Жарыс болған соң жеңіс те, жеңіліс те бар. Жарыстың қорытындысы бойынша Бас жүлдені Күреңбел қазақ орта мектебінен Кабиевтер отбасы иеленсе, бірінші орынды Сарыөзек орта мектебінен Молдабековтер отбасы, екінші орынды №49 орта мектебінен Есенқұловтар отбасы, үшінші орынды Д.Қонаев орта мектебінен Нұрлыбаевтар отбасы қанжығалады.

Жеңімпаздар «Нұр Отан» партиясы аудандық филиалы, «Сарыөзек» БПҰ және «Ай-Сана» балабақшасы атынан  дипломдармен және бағалы сыйлықтармен марапатталды.

Дидар АСҚАРҰЛЫ.