АУЫЛДА МАЛ ДӘРІГЕРЛІК ПУНКТ АШЫЛДЫ

Ұлт жоспарын негізге ала отырып, республикамыздың түкпір-түкпірінде көптеген игілікті істер іске асырылуда. Соның бірі — Шанханай ауылдық округінің орталығында Қазақстан Республикасының Тәуелсіздік күніне орай мал дәрігерлік пунктінің жаңа ғимараты бой көтерді. Салтанатты жиынға мал дәрігерлері, аудандық мал дәрігерлік пунктінің мамандары және ауыл тұрғындары қатысты.

-Қымбатты жерлестер, бүгін міне, Тәуелсіздіктің жиырма алты жылдығына орай, ауданымызда қуаныштан қуаныш орын алып жатыр. Кеше ғана Елбасының қолынан Алматы облысының екі бірдей азаматы – Жақсылық Үшкемпіров және біздің ауданның тұрғыны Бақытжан Есімов «Еңбек Ері» атағын алды. ҚР Тәуелсіздігіне орай, Елбасының және Алматы облысы әкімінің «Күніміз шуақты, еліміз қуатты болсын» деген сәлемін сіздерге жеткізгім келеді. Ауылдардың көркі кіріп, келбеті өзгеріп келеді. Аудан орталығында бүгін он бес үйдің кілті тапсырылды. Келесі жылға да жоспарлап қойған үлкен шаруалар тұр. Солардың бірі — осы ауылға келетін және Қоғалы ауылының жолына жөндеу жұмысына қаражат қарастырылған. «Жол азабы мен көр азабы қиын» деген сөз бар. Анау Бостаннан бастап, қырқыншы километрге дейінгі жол жөнделсе деген жоспарларымыз бар,-деп алдағы атқарылар жұмыстарды атады. Сонымен қатар, «Дәрігер адамдарды емдесе, мал дәрігері бүкіл адамзатты емдейді» дей келе, мал дәрігерлік пунктінің ашылуымен жиналғандарды құттықтады.

Аудандық ардагерлер кеңесінің төрағасы Төленді Сарыбаев, осы ауылдың тұрғыны, зейнеткер Бақытжан Ұлыбаев Тәуелсіздік мерекесімен және бүгінгі жағымды жайттармен құттықтап, Елбасымыздың, облыс, аудан басшыларына алғыстарын айтып, еліміздің озық отыз елдің қатарынан көрінуіне, ел-жұртымыздың аман-есен болуына, ел іргесінің бүтін болуына тілектестіктерін білдірді.

Мал дәрігерлік пунктінің кілтін тапсыру және лента қию рәсімі жасалды. Ауыл тұрғындары шашу шашып, мал дәрігерлерін құттықтады. Жиылған көпшілік жаңа ғимараттың ішін көруге асықты. Мал дәрігерлеріне ыңғайлы кішігірім бөлмелер қажетті құрал-жабдықтармен жабдықталыпты. Ақ желең киген мал дәрігері Медет Тұралыұлы мен мал пунктінің фельдшері Жомарт Бақбергенов құрал-жабдықтармен таныстырды.

Ауылдық дәмханада арнайы дастархан жайылып, мал шаруашылығы саласындағы мамандар: «Әр ауыл округтерінің орталығында осындай пункттер ашылса» деген ойларын айтып, аталмыш мерекемен құттықтап, ақ тілектерін айтты.

А.ҚАСЕНОВА.