Аудан әкімі жастармен кездесті

Таяуда аудан әкімі Алиев  Бағдат Байшалұлы  аудан жастарымен кездесті. Жалпы кездесуге «Нұр Отан» партиясының өкілі, ауылдық округ ақсақалдары, округ әкімдері, мемлекеттік қызметкерлер, жастар ісі жөніндегі нұсқаушылар, жұмысшы жастар, «Дипломмен ауылға», «Жастар практикасы» мемлекеттік бағдарламаларының қатысушылары, жас кәсіпкерлер, білім, мәдениет,  спорт саласының өкілдері мен бұқаралық ақпарат құралдары қатысты.  Бұл кездесудің мақсаты — билік пен белсенді жастар арасында тығыз байланыс орната отырып, емін-еркін пікір алмасу. Алғаш сөз тізгіні аудан әкімі Бағдат Байшалұлы алып:

— Бүгін мен үшін ерекше күн, өздеріңізбен жолықпағалы көп болды.  Кез келген мемлекеттің дамуы, болашағы сол елдің жастарында, яғни сіздердің қолдарыңызда. Біздің алдымызға қойылып отырған ортақ міндет — 30 дамыған елдің қатарына ену болса, міне, осы жолда сіздердің, жастардың алар орындарыңыз ерекше. Мемлекет басшысы Нұрсұлтан Назарбаев 26 жыл ішінде жастардың қазіргі заман талабына сай білім мен тәрбие алуларына жағдай жасап, сол бағытта «Болашақ», «Дипломмен ауылға», «Жастар практикасы»  бағдарламаларын ұсынды. Біздің мемлекетімізде болашақ жастар үшін барлық жағдай жасалынған. Тек біздерді артқа тартатын нәрсе —  жалқаулық, заң білмеу және белгілі бір істің көзін таппау. Биыл 13 жас маманға тұрғын үй берілді, 15 округте жастар ісі жөніндегі нұсқаушылар бар. «Жасыл ел» бағдарламасы бойынша 50 жас жұмыспен қамтылды. Сондай-ақ, тракторшы, дәнекерлеуші басқа да мамандықтар бойынша оқуға жіберіліп, қазіргі уақытта тұрақты жұмыс атқаруда. Облыста болған жиналыста облыс әкімі Амандық Ғаббасұлы Баталов біздің ауданға 2017 жылы атқарылған жұмыс жайлы, алдыңғы қатардағы аудан екенін, егістік алқабының 32 пайызы біздің үлесімізде екенін, биыл межелеген жоспардың барлығы орындалғанын айтып, жақсы баға берген болатын. «Тәртіпке бағынған құл болмайды» деген Б.Момышұлының сөзі бар, сол сияқты тәртіпке бағынып, талмай еңбек етсек, алынбайтын қамал жоқ. Мен сіздерге сенемін, тек алға ұмтылыңыздар, еңбек етіңіздер!-деді.

Ауданымыздың жас мамандарына сұрақ қойылып, пікір алмасуына кезек берілді. Аудандық ішкі саясат бөлімінің бас маманы Зере Сайлау: «Өмірлік құндылығыңыз, арманыңыз қандай?» деп аудан әкіміне сұрақ қойды.

— Менің өмірлік арманым —  жас мамандарға жол ашу, бағыт-бағдар көрсету,  42 жыл әр салада қызмет атқарып келемін. Осы менің араманым, құндылығым,-деді.

Ауданымыздың мақтанышы, самбо күресінің шебері Ділдәш Күрішбаеваның «Жас кезіңізде қандай спорт түрімен айналыстыңыз?» деген сұрағына:

— Біздің уақытымызда барлық спорт үйірмелері болды деп айта алмаймын. Бірақ, күреспен айналыстық, футбол, волейбол ойындарын ойнадық. Қазірд, бос уақытта, мекеме қызметшілерімен бірге волейбол ойнайтынымыз бар.

Алтынемел ауылдық окуругінің жастар ісі-жөніндегі нұсқаушысы Бауыржан Абдрахманов, жат ағым жайлы сұрақ қойды.

— Біздің елде жат ағымға кетіп, басқа елге барып қолына қару алып соғысуда. Білімсіздіктің арқасында өзі, жақындары зардап шегуде. Кербұлақ ауданы мұндай сауатсыздықтан аулақ, өткен жылдары болғаны рас қазіргі уақытта ондай мәселе жоқ.

Самбо күресінің жаттықтырушысы Тимур Айтбаев: «Артыңыздан ерген жастардың жұмысына көңіліңіз тола ма?» деген сұрағына:

— Әрине, аудандағы жастарымыз қызмет, мәдениет, спорт, білім жағынан тек алдыңғы аудандар қатарында ғана емес, шет мемлекеттерге барып, еліміздің, ауданымыздың абыройын асқақтатуда. Оған орталарыңызда отырған Ділдәш қызымыз, Мәдениет үйінің әншілері — Сәуле, Азамат, Мәулеш, Оралбек сынды ұлдарымыз талай белестерді бағындырып, ауданымызды алға жетелеуде.

«Жас Отан» Жастар қанатының белсенді мүшесі Айгерім Жексенбаева ақ тілегін білдірсе, аудандық Мәдениет үйінің әншісі Азамат Үмбетов аудан әкімінен ән орындап беруіне қолқа салды. «Нағыз қазақ қазақ емес, нағыз қазақ  домбыра» деп, домбырамен қазақтың қара өлеңін нақышына келтіре орындаған Бағдат Байшалұлы жастардың қошеметіне ие болды.

«Жауынменен жер көгерер, батаменен ел көгерер» дегендей, Алматы облысының, Кербұлақ ауданының Құрметті азаматы, аудандық ардагерлер кеңесінің төрағасы Төленді Оспанбайұлы Сарыбаев жастарға  ақ батасын берді.

                                                                                              Дидар ДИХАНБАЕВ.