Ауызсу пайдаланылуға берілді

Таяуда Тұңғыш Президент күніне орай, Күреңбелдің төріне орналасқан Шұбар ауыл округінде ауызсу көзі халыққа пайдалануға берілді. Ел қуанышына  ортақтасу үшін,  аудан әкімі Алиев Бағдат Байшалұлы, «Баймен» жауапкершілігі шектеулі серіктестігінің басшысы Бөлебаев Қахар Істеуұлы, ауылдың ақсақалдар кеңесінің төрағасы Өнербай Рашев, Шұбар ауылдық округінің әкімі Сеитқожаев Қайсар Күнтуғанұлы арнайы атбасын тіреді. Алғашқы құттықтау сөзді алған аудан әкімі Бағдат Байшалұлы:

— Бүгін ауылымызда қуанышты күн. «Су тіршілік көзі» дегендей ауыз су пайдаланылуға берілгелі тұр. Киелі мекенде өмірге келгеннен кейін, еңбектеген баладан бастап, еңкейген кәрімізге дейін үлгілі іске жарауымыз керек. «Ала қойды бөле қырыққан жүнге жарымайды» деген алаланбай, бөлінбей  бәріміз үлкен-кішіміз бар, бәріміз де Күреңбел өңірінің жақсарып, гүлденуіне еңбек етіуіміз қажет, қуаныштарыңыз құтты болсын,- деп аяқтады сөзін. Келесі сөз тізгінін алған ауылдың ақсақалдар кеңесінің төрағасы Өнербай Рашев алып:

—         Ауылымызда қуанышты сәт. «Жылқы ішінде тұлпар бар қазанаты  бір     бөлек, жігітте де жігіт бар азаматы бір бөлек» дегендей аудан әкімі Бағдат Байшалұлына, «Баймен» жауапкершілігі шектеулі серіктестігінің басшысы Бөлебаев Қахар Істеуұлына, ауыл әкімі Сеитқожаев Қайсар Күнтуғанұлына алғысымыз шексіз, қызметтеріңізге береке-бірлік, отбасыларыңызға тек жақсылық тілеймін,- деп ақ тілегін білдірді.

Бүгінгі қуанышты күннің лента қию рәсімін аудан әкімі Бағдат Байшалұлы, ауылдың ақсақалдар кеңесінің төрағасы Өнербай Рашев, «Баймен» жауапкершілігі шектеулі серіктестігінің басшысы Бөлебаев Қахар Істеуұлы қиды. Ауыл тұрғындары шашу шашып, құттықтауларын  жеткізді.

Дидар ДИХАНБАЕВ.