Пара алу – үлкен күнә

Қазақстан Республикасының 1998 жылғы 2 шiлдедегi сыбайлас жемқорлыққа қарсы күрес туралы Заңының бірінші бабында: «Азаматтардың құқықтары мен бостандықтарын қорғауға, сыбайлас жемқорлық көрiнiстерiнен туындайтын қауiп-қатерден Қазақстан Республикасының ұлттық қауiпсiздiгiн қамтамасыз етуге, сыбайлас жемқорлыққа байланысты құқық бұзушылықтың алдын алу, анықтау, олардың жолын кесу және ашу, олардың зардаптарын жою және кiнәлiлердi жауапқа тарту арқылы мемлекеттiк органдардың, мемлекеттiк мiндеттердi атқаратын лауазымды және басқа да адамдардың, сондай-ақ оларға теңестiрiлген адамдардың тиiмдi қызметiн қамтамасыз етуге бағытталған және сыбайлас жемқорлыққа қарсы күрестiң негiзгi принциптерiн айқындап, сыбайлас жемқорлыққа байланысты құқық бұзушылықтың түрлерiн, сондай-ақ жауаптылықтың пайда болу жағдайларын белгiлейдi» делінген.

Бүгінгі күннің өзекті тақырыптарының бірі де – осы. Сыбайлас жемқорлық – бүгінгі күннің індеті. «Оның зардабын келешек ұрпақ тартады-ау» деген ой да жоқ емес. Себебі, ғимарат, көпір, тас жол сынды әлеуметтік құрылыстардың сапасыз салынып жатқаны көпті алаңдатады. «Жемқорлық пен парақорлық – лағынетке ұшырататын іс», «Жемқорлықтың жазасы екі дүниеде де бар», «Пара алу – үлкен күнә» деген сөздер дәл бүгінгі заманға тыйым ретінде айтылған-ау, сірә.

Ақпараттық құралдардан сыбайлас жемқорлық жайындағы материалдарды оқып та, көріп те жүрміз. Парамен ұсталғандарды көріп, жанымыз түршігеді. «Не басына күн туды екен бейшараның?» деп түңілеміз де қоямыз. «Тек жүрсең, тоқ жүресің» деген сөз бекер айтылмаған. «Не істесең де таза қолыңмен істе» деп бұрынғылар текке айтпаған. «Илегеніміз бір терінің пұшпағы» дегендей, еліміздің көркейіп, өсіп-өркендеуіне үлес қосам деген, «Елім, жерім, Отаным» деп жүрегі соққан әр азамат жемқорлықтан бойын аулақ ұстаса, іргеміз берік, тұғырымыз нық болары сөзсіз. 

 «Ұрлық түбі – қорлық» дегендей, парақорлықтың да, жемқорлықтың да түбі – қорлық. Хадис шәрифте: «Пара алғанға, бергенге және бұлардың арасында параға арашы болған адамға да Аллаһ лағынет етсін» делінген екен. Үлкен жетпіс күнәнің бірі – парақорлық. Олай болса, жемқорлықтан іргемізді аулақ ұстап, өзекті өртеген жегіқұртпен көп болып күресейік.

Айнаш ҚАСЕНОВА.