Төсбелгі табыс етілді

Жуырда ауданымызда «Алматы облыстық жергілікті кәсіби агроөндірістік кешені мен мемлекеттік мекемелер қызметкерлерінің одағы» қоғамдық бірлестігі төрағасы Тоқсейітов Тастан Тоқсейітұлы, орынбасары Идралиева Рая Мұсақызы, «Алматы облыстық жергілікті кәсіби агроөндірістік кешені мен мемлекеттік мекемелер қызметкерлерінің одағы» қоғамдық бірлестігі Еңбекшіқазақ  аудандық филиалының төрағасы Жанаев Ілияс Жаңабайұлы, аудан әкімі Алиев Бағдат Байшалұлына ауданның өркендеп өсуіне зор үлес қосқаны үшін, экономика, мәдениет,   әлеуметтік сала бойынша жеткен жетістіктерді басшылыққа ала отырып, аудандық кәсіподақ филиалының жұмысына қолдау көрсеткені үшін төсбелгі табыс етті.

 Аудан әкімі Б.Алиев:

— Биылғы жылы ауданымыз 9 айдың қорытындысы бойынша  барлық көрсеткіштерден  жоспарды орындады. Рас,  өнеркәсіп өнімдерінен  ақсап тұрмыз. Болашақта  бұл олқылықтардың да орны толады деп ойлаймын. Бүгінгі беріліп жатқан марапат тек маған ғана емес, ауданымызға көрсетілген құрмет деп ойлаймын. Ауданымыздағы жетістіктердің барлығы осы отырған азаматтардың, ұжымдарының  арқасында жүзеге асырылып жатқаны анық. Сол үшін осы отырған азаматтарға алғыс айтқым келеді. «Бірлесіп пішкен тон келте болмас» деген. Ауызбірлік, ынтымақтың арқасында талай асуларды бағындырарымыз сөзсіз,- дей отырып, ауданда атқарылған  іс-шаралар, жеткен жетістіктер мен кеткен кемшіліктер туралы толыққанды мағлұмат берді.

— Құрметті Кербұлақ ауданының бетке ұстар азаматтары мен азаматшалары! Біздің сіздердің ауданға келген себебіміз, өздеріңізбен кездесіп, алдарыңызда аудан әкіміне, жалпы ауданға деген тілегімізді айту. Аудан  әкімінің  сөзінен осы ауданда атқарылған шараларға толық қанықтық.Жұмыс бабымен  кемінде екі жетіде  бір рет аудандарыңызды басып өтеміз.Әр өткен сайын осы ауданда болып жатқан өзгерістерді байқаймыз. Кәсіподақ ұйымына дұрыс көзқарас жасап, керек кезінде көмек  беріп, кажет жерінде талап етіп жүрген аудан әкімдері көп емес. Жасыратыны жоқ «Аулақ жүр» дейтін аудан әкімдері де баршылық. Ал, Кербұлақ ауданының  кәсіподаққа көп көңіл бөліп, көмек беріп жүргені көңіл қуантады. Аудандарыңыздың бұдан да  жақсы көрсеткіштерге қол жеткізіп, өсіп-өркендеуіне біздер тілектеспіз.

Облысымызда мемлекеттік қызметкерлер мен ауылшаруашылық қызметкерлері біріккен 30 мыңға жуық кәсіподақ мүшелері бар. Жақында  кәсіподақ ұйымының жұмысын қорытындылағанымызда  Кербұлақ ауданы бірінші орын алды. Аудан әкімдерінің ішінен Кербұлақ ауданының әкіміне төсбелгі берілсін деген қаулы шығарылды. Президиумның тапсырмасын орындау үшін үш мүшесі орталарыңызға келіп отырмыз,- деп аудан әкімі Б.Алиевка қоғамдық бірлестіктің төрағасытөсбелгіні табыс етті.

«Алматы облыстық жергілікті кәсіби агроөндірістік кешені мен мемлекеттік мекемелер қызметкерлерінің одағы» қоғамдық бірлестігі Кербұлақ аудандық филиалының төрағасы Ескелдинов Еділхан Ниязұлы сөз алып, ауданымызда атқарылған шаруаларды елеп-ескеріп, бағалағандары үшін «Алматы облыстық жергілікті кәсіби агроөндірістік кешені мен мемлекеттік мекемелер қызметкерлерінің одағы» қоғамдық бірлестігі Президиум мүшелеріне алғысын білдірді.

Өз тілшіміз.