Аудандағы тоғыз айдың жұмысы қорытындыланды

Жуырда аудан әкімдігінің мәжіліс залында аудан  әкімдігінің мәжілісі болып өтті. Мәжілісті аудан әкімі Алиев Бағдат Байшалұлы  ашып жүргізіп, бүгінгі күн тәртібінде қаралатын негізгі мәселелермен таныстырды. Аудандық экономика және бюджеттік жоспарлау бөлімінің  басшысы Төлегенов Шалқыбай Молдахметұлы тоғыз ай ішінде атқарылған жұмыстар мен алдағы уақытта іске асырылуға тиіс шаруа жайын баяндап, азды-көпті кеткен кемшіліктерге тоқталды. Оның айтуынша, өңір экономикасын дамытып, өнімді еселеуде жыл басынан бері біраз істің басы қайырылып, оң нәтижелерге қол жеткізілген. Аудан экономикасының негізгі салаларындағы есепті мерзімде өткен жылы 1 млрд. 288 млн.теңгенің өнімі өндірілсе, ағымдағы жылы 2 млрд. 58 млн.теңгенің өнеркәсіп өнімі өндіріліп, нақты көлем индексі 66,7 пайызға орындалса, ауыл шаруашылығында ағымдағы жылы 26 млрд. 366 млн. теңгенің өнімі өндіріліп, нақты көлем индексі 109,4 пайызға орындалған.

 Баяндамашы кемшін тұстарды айтып, өнеркәсіп өнімдерінің нақты көлем индексінің орындалмау себебіне, егістік бойынша алынған өнім көлеміне тоқталды.Мал шаруашылығында «Сыбаға» бағдарламасы бойынша  272 бас, «Құлан» бағдарламасы  бойынша 115 бас жылқы сатып алынғандығын, ауданымызда сегіз кооператив құрылып, олар мал шаруашылығы және сүт өнімдерімен айналысып жатқандығын айтып, ет комбинаты  есепті мерзімде 880 бас ірі қара, 5 бас жылқы,1200 бас қой сойып,176 тонна ет, 15 тонна шұжық шығарғандығын, «Шадиев Ф.К» шаруа қожалығында 6000 бас, жеке қосалқы шаруашылықтармен шаруа қожалықтарында 1000 бас ірі қараны бордақылау жолға қойылғандығын атап көрсетті.

— Ағымдағы жылы 4152 шаршы метр тұрғын үй пайдалануға беріліп,125 пайызға орындалды. Бөлшек тауар айналымы 3 млрд. 568 млн.теңгені құрап,105,3 пайызға өсті.Автокөлік жолдарына ағымдағы жылы облыстық маңызы бар Сарыөзек ауылына кірме жолдарына 130 млн.теңге қаржы бөлініп, игерілді. Сарыөзек ауылының ішкі жолдарына, жөндеу жұмыстарына 100 млн.теңге бөлініп, Қ.Қайсенов, Б.Момышұлы көшелері жөнделді. Жұмыссыздар саны 150 адамға азайды. Жаппай кәсіпкерлікті дамыту үшін несие беруге 145 млн.теңге бөлінсе, бүгінгі таңда 43 адам қосымша бөлінген 199 млн.теңге несие алды. Жастар іс тәжірибесін ұйымдастыруға алты айға 13 млн.655 мың теңге бөлініп, 49 адам жұмыс істеуде. «Өрлеу» жобасына қаралған 17 млн. 505 мың теңге 56 отбасына беріліп, бөлінген қаржы толығымен игерілді.Аудан бойынша 47 емдеу орны жұмыс жасауда. 52 мектептің 33-де оқушыларды ыстық тамақпен қамту ұйымдастырылған. Өткен жылы 72 түлек грантқа қол жеткізсе, ағымдағы жылы 120 түлек грантты иеленді. Ендігі мақсатымыз 15 шақырым Жоламан ауылына кірме жолды және 7 шақырым Сарыбұлақ ауылына кірме жолды орташа жөндеу жұмыстары және Қаспан, Тастыбастау, Майтөбе, Шанханай, Онжас, Доланалы ауылдарының су жүйесін орналастыру, 2018 жылға арналған бекітілген бюджетке енгізу басты міндетімізге айналып отыр,-деп атап көрсеткен Ш.Төлегенов аудандағы барлық салаларда атқарылған жұмыстарға тоқталды.

Баяндама бойынша Сарыбұлақ ауылдық округінің әкімі Б.Бектемиров, Талдыбұлақ ауылдық округінің әкімі М.Қашқымбаев, Қарашоқы ауыл  округінің әкімі Д.Ақбасова сөз алып, өздерінің атқарған  жұмыстарына қысқаша тоқталды. Кербұлақ аудандық экономика және бюджеттік жоспарлау бөлімінің басшысы Ш.Төлегеновтың «Ауданның 2017 жылғы III тоқсандағы әлеуметтік-экономикалық дамуының қорытындылары және IV тоқсанындағы міндеттері туралы» баяндамасы  бойынша қаулы  қабылданды.

Аудан әкімі Б.Алиев ауданымызда атқарылған жұмыстарға жеке-жеке тоқталып, өнеркәсіп өндірісі бойынша жұмысты жандандырып, қолға алу керектігін баса айтып, бөлім басшыларына тапсырмалар беріп, әкімдік мәжілісін қорытындылады.

Дидар ДИХАНБАЕВ.