Өткен жолды бағалау және болашаққа көзқарас

— Көп жылдар бойы бір өзім архивтің жұмысын абыроймен атқарып келдім. «Жалғыздың үні шықпас, жаяудың шаңы шықпас» дегендей, жұмыстың өз ретімен жүруіне, көшіп-қонуына  жұбайым Елкеннің де көп көмегі тиді. Гүлбану Түркістанқызының ең алғаш әлеуметтік қызметкер ретінде үш айға жұмысқа келгенінен өзін еңбекқор, жауапты, өз ісіне мығым екенін көрсете білгенін айта кетуім керек. Сөйтіп, үш ай сайын аудандық жұмыспен қамту және бағдарламалар бөлімінің басшысы Айгүл Тұрдақынқызынан «Осы қызды маған жібере бер. Келген адамға үйрете беру де оңай шаруа емес, уақыт оны қаламайды. Үйренген Гүлбануды жібер» деп қалдыра беріп, кейін бір штат беріліп, соңында осы мекемеге басшы болып қалды. Жақсы басшы болады деп сенім білдіре аламын,-деп басшы жайында жылы лебізін айтты.

Аудандық ішкі саясат бөлімінің бас маманы Зере Сайлау:

— Мен тарих факультетін тәмамдағанмын. Курстық жұмысты қорғау барысында архивтен іздену керек болды. Сол кезде сартап болған құжаттарды көріп: «Бұлардың барлығын электронды жүйеге енгізіп қойса, кейінгі ұрпаққа да керек қой» деп ойға қалған едім. Көп кешікпей сол ойымның іске асқанына қатты қуандым. Бұл әрине, көреген Елбасымыздың сара саясатының арқасы. «Ақпаратты Қазақстан-2020» мемлекеттік бағдарламасына сәйкес «Құжаттардың бірыңғай электрондық архиві» ақпараттық жүйесі құрылып, енгізіліп жатқаны қуанышты жайт.

Сарыөзек ауылдық округі әкімінің орынбасары Ләйла Жауынбайқызы:

— Архивтің жиырма бес жылдығы құтты болсын. 2005 жылы бас маман қызметін атқарғанымда бес жылда бір рет құжаттарды архивке өткізу керек екен. Архивке құжаттарды апарғанымда Гүлбану көмекшісі болатын Жарылқасын Мәуленбайқызының. Құжаттарды қалай реттеу керектігін, қалай тігу керектігін осы кісілер үйретіп, құжаттарды қабылдаған болатын. «Көргені жақсы көш бастайды» демекші, міне, сіздің тәрбиеңізді алған Гүлбану Түркістанқызы сондай тиянақты, жауапкершілігі мол, кішіпейіл жан. Өздеріне міндеттелген жұмыстарын мінсіз атқарып, көптің көңілінен шығуда. Еңбектеріңізге табыс, отбастарыңызға береке-бірлік тілеймін,-деп, архив қызметкерлеріне сыйлық табыс етті.

Аудандық мәдениет және тілдерді дамыту бөлімінің басшысы Әділжан Әділхан:

— Мерекелеріңіз құтты болсын. Жарылқасын Мәуленбайқызы, сіздің көп жылдар бойы архивтің жанашыры болғаныңызды, қиын-қыстау кезеңдерде ел игілігі үшін абыроймен еңбек еткеніңіздің куәгерімін. Мұнда әр саладан құжаттамалар келіп түсіп жатады. Сол шаң басқан архивте тапсырыс бойынша құжаттарды іздеу де, оларды рет-ретімен қою да оңай шаруа емес. Осындай шараға бөлім, мекеме басшылары келіп, қатысса, архивтің жұмысымен танысса, олар да көп жайттарды түсінер еді. Алдағы уақытта тағы штат бірлігі беріліп жатса, жеке ғимарат қарастырылса, нұр үстіне нұр болар еді.

«Алматы облысының мемлекеттік архиві» коммуналдық мемлекеттік мекемесінің бас директорының орынбасары Аблаев Талғат Алдақуатұлы:

— Рұқсат болса, мен бір жарнама айта кетейін. Алматы облысы мемлекеттік архивінің ұйымдастыруымен биылға «Үздік ведомстволық архив» байқауы өтпек. Бұл байқаудың мақсаты – құжатқа дұрыс көзқарасты қалыптастыру. Шынын айтсақ, көп басшылар архивке көңіл бөле бермейді. Осы байқауға қатысыңыздар, жүлделі орындарға бағалы сыйлықтарымыз бар. Келесі бір айта кететін жайт, әр филиалда жеке қордың ашылуы бойынша актуальді мәселе болып жатыр. Ауданның белгілі, атақты, еңбек ардагері, танымал, қайраткер адамдары жайында жеке қор ашу керек. 

Аудандық кітапхананың директоры Баян Нұрбаева:

— Мерекелеріңізбен құттықтаймын. Архивпен бірігіп, іс-шараларды өткізіп жатамыз. 1999 жылдары кітапханалар тарап кеткенде, талай кітапханашылар еңбек кітапшаларын жоғалтып, іздеп жатты. Осы архивтің арқасында мәліметтерді тауып, зейнеткерлікке шыққан кітапханашыларды көрдік. Архивтің қызметкерлеріне бар жақсылықты тілеймін. Еңбектеріңіз еленіп, ел алғысын арқалай беріңіздер.

Шара барысында Жарылқасын Мәуленбайқызына архив филиалының басшысы Гүлбану Түркістанқызы «Орамал тон болмайды, жол болады» деген әдемі үрдіспен естелік сыйлық тарту етті. Дөңгелек үстелдің соңында аудандық Ә.Сарыбаев атындағы Мәдениет үйінің өнерпаздары әннен шашу шашты.

Айнаш ҚАСЕНОВА.