Ұлық мереке атап өтілді

30 тамыз — Қазақстан Республикасының Конституция күніне арналған аудан әкімдігінің ұйымдастыруымен орталық алаңда  «Айбары асқақ Ата Заң» атты меркелік іс-шара өтті. Салтанатты мереке Қазақстан Республикасының мемлекеттік гимнімен  ашылды. Конституция күнімен құттықтау үшін сөз аудан әкімі Алиев Бағдат Байшалұлына берілді.

— Құрметті қонақтар және Кербұлақ ауданының тұрғындары! Сіздерді Қазақстан Республикасының Конституциясы күнімен шын жүректен құттықтаймын! Конституция күні — мемлекетіміздің ең ұлық мерекелерінің бірі. Қазақстан Республикасының  Конституциясы барлық заң салаларының негізі болып табылады, ал оның нормалары басқа заңдар үшін басты қағида болып есептеледі. Конституциямыз қабылданғаннан кейінгі жылдарда еліміз барлық жолда үлкен жетістіктерге жетіп, іргелі елге айналды. Біздің мақсатымыз — еліміздің Тәуелсіздігін баянды ету, болашақ ұрпақтың жүзін жарқын етіп, білім нәрімен сусындатсақ, дұрыс  тәрбие берсек, бұл мақсаттарға  асқан табандылықпен көңіл бөлсек, ер бірлігін тыныштығын сақтасақ, мәңгілік елге айналарымыз хақ. Сондықтан елімізде, ауданымызда ынтымақ пен бірлігіміз нығая берсін дей отырып, барша тұрғындарын тағы да Конституция күні  мерекесімен шын жүректен құттықтаймын. Барлықтарыңыздың отбасыларыңызға амандық, ырыс, береке тілеймін,-деді.

Конституция күніне арналған мерекелік іс-шарада Сарыөзек ауылдық округі әкімшілігінің ұйымдастыруымен автокөлік шеруі өтті. Ол орталық алаңнан бастап айналмалы жолмен Күреңбел мектебі, «Ай-сана» балабақшасының жолымен кері қайтып, Сарыөзек-Қорғас тас жолы арқылы теміржолдан Жібек жолы көшесімен аудан әкімшілігіне дейінгі аралықтарды жүріп өтті. Соңы аудандық Мәдениет үйі көркемөнерпаздарының  концерттік бағдарламасына ұласты.

Дидар ДИХАНБАЕВ.