Аудандық прокуратурада

Жақында аудандық прокуратураның ұйымдастыруымен  Жоламан мен Малайсары ауылдарының маңынан табылған көне тарихи таңбалы тастар туралы отырыс болып өтті.

Отырысты аудан прокурорының  орынбасары Ізтаев Асқар Исағалиұлы жүргізіп отырды.

Отырысқа аудандық мәдениет және тілдерді дамыту бөлімінің басшысы Әділжан Әділхан, жеке кәсіпкер Нұрбай Жантілеуов, «Арқарлы тас»  ЖШС атқарушы директоры Мәди Омархаджаев, аудандық жер қатынастары бөлімінің  басшысы Мақсат Қартбаев, Сарыбастау ауылдық округінің  әкімі  Қайрат Сұлтанбеков, аудан прокуратурасының прокуроры Олжас Абдраман, аудан әкімінің  орынбасары Болысбай Момбаев, жергілікті полиция қызмет бастығының орынбасары Қабыл Тілеуов, аудандық кәсіпкерлік  бөлімінің  басшысы Әділхан Рысбеков, облыстық кәсіпкерлер палатасының  Кербұлақ аудандық филиалының  директоры Болат Тастанбеков, Малайсары стансасының тұрғыны Қожатай Үдербаев қатысты.

Отырысы ашқан аудан прокурорының орынбасары Асқар Исағалиұлы осы аймақтардан табылған петроглифтер  туралы облыстық, республикалық баспасөздерде  жарияланғанын, кейін олардың зертханаға өткізіліп  археологиялық сараптама қорытындысы шыққанын, сондықтанда ол  жерлер  мемлекет, құқық қорғау органдары тарапынан  қорғалатынын олардың талан-таражға түсуіне жол берілмейтінін, сондықтан  сол маңдағы ел-жұртпен кездесулер өткізіп, түсіндірме жұмыстары жүргізілу  керектігін айтты. Өз кезегінде сөз алған Нұрбай Қожатайұлы Арқарлы тас зауыты  1930 жылдан бастап  пайдалануға берілгенін, ал 70 жылдары жаппай сатылымға шыққанын сол жылы осы тастардан Алматы қаласында офицерлер үйі салынғанын, 2006 жылдан бастап конкурс арқылы облыс әкімінің  рұқсатымен 34 га жері тас және қиыршық тас өңдеу жұмыстарын жүргізу үшін берілгенін, көне тарихи таңбаларды сақтап қалу кез-келген азаматтың борышы екенін, алайда барлығы заң шеңберінде жасалу керектігін тілге тиек етті. 

Аудандық мәдениет және тілдерді дамыту бөлімінің басшысы Әділжан Әділхан өз сөзінде Елбасының «Болашаққа бағдар: рухани жаңғыру» атты мақаласындағы «Туған жер» атты арнайы  бағдарламасының  аясында  жақында бұл тарихи тауға  облыстық Мәдениет басқармасының ұйымдастыруымен  Алматы облыстық тарихи мәдени  мұраны қорғау жөніндегі  орталығынан мамандар  келгенін, бұл ең бірінші болашақ ұрпақ  үшін керектігін айтты. Бұдан соң өз кезектерінде сөз алған Сарыбастау ауылдық округінің әкімі Қайрат Сұлтанбеков, аудандық жер қатынастары бөлімінің басшысы Мақсат Қартбаев, Алматы облысы кәсіпкерлер палатасының  Кербұлақ аудандық филиалының директоры Б.Тастанбеков,  «Арқарлы тас» ЖШС атқарушы директоры  Мәди  Омархаджаев, жергілікті полиция қызметі бастығының орынбасары Қабыл Тілеуовтар Жетісу өңірі петроглифтерге бай өлкенің бірі  екенін  әлі де  зерттеулерді талап  ететінін  айтса,  аудан әкімінің  орынбасары  Болысбай Момбаев  ауданда мемлекеттік  қорғауға  алынбаған, әлі де зерттелмеген  238 археологиялық  ескерткіштер бар екенін, 8 аймақ мәдениет министірлігі  мен мәдениет басқармасының бақылауында екенін  айтып тарихи  петроглифтерді  сақтап  қалу үшін бүкіл халық болып жұмылу керектігін ескертті. Отырысты аудан прокурорының орынбасары Асқар Исағалиұлы  қорытындылап, Жоламан, Малайсары, Сәмен  ауылдары арасындағы Арқарлы  петроглифтері  мемлекеттік  қорғауға алынып, болашақта тарихи  мұра ретінде ескерткіш  боп қалатынын және оны  талан-таражға салам деушілер  заң бойынша жазаға тартылатынын айтып, бұл тастар төңірегінде  ауыл адамдарымен  жүздесулер өткізіп, түсіндірме жұмыстарын жүргізу үшін  АІІБ-нің учаскелік инспекторларына, жер қатынастары бөліміне  ауыл әкімдеріне  арнайы тапсырмалар берді.

Дина АМАНҚЫЗЫ.