Құрметті аудан тұрғындары !

Сіздердің назарларыңызға Алматы облысы Кербұлақ ауданының имамдарының ұйымдастыруымен, аудан тұрғындарының жиындарында қабылданған шешім мәтінін ұсынамыз:
Қазақстан Мұсылмандары Діни басқармасының төрағасы Бас муфти Ержан қажы Малғажыұлының бастамасымен 2017 жылы шыққан «ЖАНАЗА ЖӘНЕ ЖЕРЛЕУ РӘСІМДЕРІ» атты кітапті талқылап, аудан имамдарының ұйымдастыруымен аудан тұрғындарының жалпы жиналысында қабылданған  ШЕШІМ: Қара жамылып отырған үйден ас ішуге қатысты шариғатымызда: «Қазалы үйден үш күнге дейін қазан асылмасын»  делінген. Сондықтан қазалы үйге ауыртпалық салуға тыйым салынсын. Алыстан келген қонақтарға берілетін дастарханды марқұмның туыстарының, жора-жолдастарының немесе көршілерінің үйіне жасаған жөн. Жаназа дастарханын той секілді жасап, ысырапқа ұрынбау үшін  ас мәзіріне мына тағамдар кірсін:
1. Шай, нан, бауырсақ және жеті нан.  Қант, кәмпит, піспенан (печенье). Ыстық тағам (ет немесе күріш);
2. Садақа той емес, сондықтан марқұмға ас беру кезінде тілек сөз айтуға тыйым салынсын. Оның орнына халыққа имандылыққа шақыратын уағыз айтылсын;
3. Арапа күні шек шалдыру шариғатымызда жоқ болғандықтан,  бұған тыйым салынсын;
4. Әдептілік мұсылманға тән қасиет болғандықтан, шақырған  жерге кешікпей дер уақытында бару міндет;
5. Көпшілік жиналған жерде Құранның қысқа сүрелері оқылсын;
6. Рамазан айында күндізгі уақытта ас, құдайы тамақ беруге тыйым салынсын.
Мына адамдарға жаназа оқылмайды:
1. Бүлікшілер (Мұсылмандарға қарсы қару қолданып, соғыс ашқандар).
2. Қарақшылық жасау кезінде өлген тонаушылар мен сол секілді қылмыс кезінде көз жұмғандар;
3. Ата-анасын өлтіргендер;
4. Мұсылман дінін тастап, өзге дінге өткендер. (Бұлар мұсылман зиратына жерленбейді).
— Жаназада митинг өткізуге тыйым салынсын;
— Марқұмның құлыптасына тек аты-жөні, тегі, туған және өлген жылы жазылсын. Дұға және басқа да сөздер жазуға, сурет салуға  тыйым салынсын;
— Марқұмның басына кесене тұрғызу өліге де, тірілерге де еш пайдасы болмағандықтан ысырапқа тыйым салынсын. Оның орнына садақа беріп, мұқтаж адамдарға көмек бергені игі;
— Қаралы үйде қонақасы жасауға тыйым салынады. Алыстан келген қонақтарға марқұмның ағайындары, көршілері қонақасы береді.
— Қайтыс болған кісінің жасы сексенге жетпесе шапан таратуға, ақша шашуға тыйым салынсын. Жасы сексеннен асқан қарт болса тәбәрік ретінде үш шапан беруге болады.
Шешімнің орындалуына ауыл мешіттерінің имамдары жауапты.
С.АНДАҚҰЛОВ,
ауданның
бас имамы.