Ұстаздарды еске алды

Жақында Ж.Жапаров атындағы орта мектеп мектепке дейінгі шағын орталығында волейболдан аудандық турнир өтті.
Турнирдің мақсаты — ауылдың спортшы азаматтары болған, марқұм Қасабеков Сламғазы Байжұмаұлы мен Әмірқұлов Шәріпхан Қасенханұлын еске алу болатын. Аталған тұлғалар Ж.Жапаров орта мектебінде ұзақ жылдар жемісті еңбек етіп, аудан спортына үлкен үлестерін қосқан. Турнирдің ашылу салтанатына аудандық білім қызметкерлері кәсіподақ ұйымының төрағасы Жақан Дуанаев, ауылдық ақсақалдар алқасының төрағасы Баян Сырлыбеков, ауыл әкімі Азамат Қаспанов, зейнеткер ұстаз Қозыбек Бақбергенов, әріптестері Ғалымжан Асанов, ұжым басшысы Ержан Күлшембаев, мектеп директоры Бағдат Шунетов, Сламжан ағаның інісі Тоқан Қасабеков және олардың ұрпақтары қатысты.
Турнирді ұйымдастырушы марқұмдардың ұрпақтары – Сламғазыұлы Ержан және Шәріпханұлы Әділ сөз алып, жиналғандарға алғыстарын жеткізді.
Жарысқа аудан бойынша 11 команда қатысты. «Жүзден жүйрік, мыңнан тұлпар» демекші, жарыста 1-орынды иеленген Ж.Жапаров атынындағы орта мектептің ұстаздар командасы, 2-орынды иеленген Күреңбел қазақ орта мектебінің ұстаздары, 3-орынды иеленген Ш.Уәлиханов атындағы орта мектебінің ұстаздары ақшалай сыйлықпен, сонымен қатар, үздік ойыншылар Н.Үрімжан, Қ.Мейрамбаева, А.Еркінбектер Алғыс хатпен марапатталды.
Жарыс соңында ұйымдастырушылар Әділ Қасенхан, Ержан Қасабеков жарысты қорытындылап, осы турнирге демеуші болған Батырхан Сүттіқожанов, Сенбек Құсайынов, Ержан Күлшенбаевтарға, мектеп ұжымына, ауылдың түлектеріне жанұялары атынан адами алғыстарын білдірді.
«Өлі разы болмай — тірі байымайды» деген сөз бар қазақта. Осы күні марқұмдардың рухына бағышталып құран оқылып, ас берілді.
Мақсат САДЕКОВ,
Қызылжар ауылының спорт нұсқаушысы