Қандай да бір мемлекеттің қуаты оның экономикалық немесе саяси жетістіктерімен ғана емес, ең алдымен заңның үстемдігімен және қоғамдық тәртіптің беріктігімен өлшенеді. Заң салтанат құрған қоғамда әділет үстемдік етіп, азаматтардың құқықтары мен бостандықтары сенімді қорғалады. Сондықтан заң мен тәртіп – мемлекет дамуының ғана емес, ұлттың өркениетті келешегінің де басты кепілі.
Қазіргі қоғамда әрбір азаматтың құқықтық мәдениеті ерекше маңызға ие. Заңды білу – құқықты қорғаудың алғышарты болса, оны сақтау – азаматтық жауапкершіліктің айқын көрінісі. Заң талаптарын орындау арқылы біз өз қауіпсіздігімізді ғана емес, қоғамдық тұрақтылық пен өзара сенімді де нығайтамыз.
Құқықтық мемлекет құру – барша қоғамның ортақ мақсаты. Бұл жолда құқық қорғау органдарының қызметімен қатар, әр азаматтың саналы ұстанымы шешуші рөл атқарады. Қоғамдық тәртіпті сақтау, сыбайлас жемқорлыққа төзбеушілік таныту, өзгенің құқықтарын құрметтеу және заң талаптарын бұлжытпай орындау – ел алдындағы ортақ жауапкершілік.
Ерекше назар аударатын мәселе – жас ұрпақтың құқықтық тәрбиесі. Жастардың бойында заңға құрмет, әділдікке адалдық және Отанға деген жауапкершілік қалыптасқан жағдайда ғана құқық бұзушылықтың деңгейі төмендеп, қоғамда сенім мен бірлік нығая түседі. Сондықтан құқықтық мәдениетті қалыптастыру отбасыдан басталып, білім беру ұйымдары мен қоғамның бірлескен ісіне айналуы тиіс.
Заң – тек құқықтық құжат қана емес, ол – қоғамдағы әділдік пен тұрақтылықтың берік тірегі. Заңға құрмет көрсеткен елдің болашағы баянды, бірлігі мығым болады. Ендеше, заң мен тәртіпті сақтау – әрбір азаматтың міндеті ғана емес, туған елінің жарқын келешегіне қосқан нақты үлесі.
Қызылжар ауылдық округінің әкімдігі.