Талдықорған қаласының тұрғын үй-коммуналдық шаруашылық бөлімінің басшысы Алмас Барлыбеков:
– Біздің басты мақсатымыз – егілген жасыл желектердің сақталуын қамтамасыз ету. Сондықтан көшеттерді күтіп-баптау, суару және ирригациялық жүйелерді жаңғырту жұмыстары тұрақты жүргізілуде. Бұл шаралар қаланың экологиялық жағдайын жақсартып, тұрғындарға жайлы орта қалыптастыруға мүмкіндік береді, – деді.
Талдықорған қаласы әкімдігінің баспасөз қызметі берген ақпарат бойынша жасыл желектерді тиімді күтіп-баптау мақсатында «Жастар» саябағы мен Қаратал өзенінің жағалауындағы скверде автоматты суару жүйесінің құрылысы жүргізілуде. Аталған жұмыстар наурыз айында басталып, бүгінде оның 70 пайызы орындалған. Жобаны шілде айында аяқтау жоспарланған. Биыл қаладағы арық желілерінің 5 шақырымына ағымдағы жөндеу жұмыстары жүргізілуде. Қазіргі уақытта қаланың оңтүстік-батыс және орталық бөліктеріне су жеткізу жұмыстары атқарылуда. Ал арық желілеріне су беру 3 маусымнан басталады.
«Жетісу-Ақпарат».