2026 жылғы 6 қарашада Кербұлақ ауданының орталығы Сарыөзек ауылында жаңа теміржол вокзалының салтанатты ашылу рәсімі өтті. Ел игілігіне бағытталған маңызды нысанның пайдалануға берілуі – аудан өміріндегі елеулі жаңалықтардың бірі.
Салтанатты шараға аудан әкімі Жүнісбеков Жанат Төлегенұлы, «Сарыозексервис» құрылыс компаниясының бас директоры Бекбергенов Жанахмет Әбілмәжінұлы, аудандық Ақсақалдар алқасының төрағасы Рысбеков Бөкен Кәбиұлы, теміржол саласының өкілдері мен ауыл тұрғындары қатысты.
Шара барысында ауданның әлеуметтік-экономикалық дамуы үшін маңызы зор нысанның ашылуымен құттықтау сөздер айтылып, игі тілектер білдірілді. Ақсақалдар ақ батасын беріп, жаңа вокзалдың ел игілігіне ұзақ жылдар қызмет етуіне тілектестік танытты. Одан кейін салтанатты лента қию рәсімі өтіп, жиналған қауым жаңа ғимараттың ішкі құрылымымен және мүмкіндіктерімен танысты.
Жаңа теміржол вокзалы – ауданның көлік инфрақұрылымын жетілдіруге бағытталған маңызды жобалардың бірі. Заманауи талаптарға сай бой көтерген нысан жолаушыларға қолайлы жағдай жасауға, теміржол қызметінің сапасын арттыруға және өңірдің көлік-логистикалық әлеуетін нығайтуға мүмкіндік береді.
Теміржол – елді елмен, жерді жермен байланыстыратын маңызды қатынас жолы. Сондықтан Сарыөзек ауылында жаңа вокзалдың ашылуы тек аудан тұрғындары үшін ғана емес, осы бағытта қатынайтын барша жолаушы үшін де қуанышты жаңалық.
Жаңа нысанның ашылуы – өңірдің өркендеуіне қосылған тағы бір үлес, болашаққа бастар игі қадам. Сарыөзек жұрты үшін маңызды нысан ел игілігіне қызмет етіп, жолаушылардың игілігіне жарай берсін! Жолдарыңыз ашық, сапарларыңыз сәтті болсын!
