Құрылтайдың басты ерекшелігі – әртүрлі сала өкілдерінің, зиялы қауымның, жастардың және азаматтық қоғам мүшелерінің басын қосып, елдің болашағына қатысты маңызды мәселелерді ашық талқылауына жағдай жасауы. Мұнда айтылған әрбір ұсыныс қоғам сұранысынан туындап, мемлекет дамуына оң ықпал етуді көздейді.
Бүгінде ұлттық құндылықтарды сақтау, жастар тәрбиесі, білім сапасын арттыру, ана тілінің мәртебесін көтеру, мәдени мұраны насихаттау сияқты мәселелердің Құрылтайда кеңінен көтерілуі – оның маңызын арттыра түседі. Себебі мұндай бастамалар халықтың бірлігі мен елдің рухани дамуына қызмет етеді.
Құрылтай – тек пікір алмасатын жиын ғана емес, қоғам мен мемлекет арасындағы сенімді нығайтатын маңызды диалог алаңы. Ортақ мақсатқа ұмтылған ел ғана тұрақты дамып, жарқын болашаққа қадам басады. Сондықтан Құрылтайда көтерілген бастамалар мен ұсыныстардың жүзеге асуы – әрқайсымыздың белсенділігімізге және азаматтық жауапкершілігімізге де байланысты.