2026 жылғы 23 тамызда Қазақстан Республикасының Құрылтай депутаттарын сайлау өтеді. Бұл – еліміздің қоғамдық-саяси өміріндегі маңызды оқиғалардың бірі. Құрылтайдың құрылуы Қазақстанда жүргізіліп жатқан саяси жаңғыру мен институционалдық реформалардың маңызды кезеңі ретінде қарастырылады. Оның негізгі мақсаты – халықтың мүддесін білдіретін, елдің әлеуметтік-экономикалық және қоғамдық дамуына қатысты маңызды мәселелерді заңнамалық деңгейде шешуге бағытталған тиімді өкілді орган қалыптастыру.
Құрылтайдың қалыптасуы қоғам мен мемлекет арасындағы өзара байланысты одан әрі нығайтып, азаматтардың ел басқару ісіне қатысу мүмкіндігін кеңейтеді. Жаңа өкілді органның құрамына 145 депутат сайланады. Депутаттардың өкілеттік мерзімі бес жылды құрайды. Сайлау жалпыға бірдей, тең және төте сайлау құқығы негізінде жасырын дауыс беру арқылы өткізіледі.
Алдағы саяси науқанның басты ерекшелігі – азаматтардың өз таңдауын жасап, мемлекеттің болашақ даму бағытын айқындауға тікелей атсалысуы. Сайлау – демократиялық қоғамның маңызды институттарының бірі. Сондықтан әрбір азаматтың дауыс беруі өзінің конституциялық құқығын жүзеге асырумен қатар, ел алдындағы азаматтық жауапкершілігін білдіреді.
Құрылтай депутаттығына үміткерлерге де заңнамада нақты талаптар белгіленген. Кандидат Қазақстан Республикасының азаматы болуы, 25 жасқа толуы және еліміздің аумағында соңғы он жыл бойы тұрақты тұруы қажет. Бұл талаптар Құрылтай құрамына елдің қоғамдық өміріне белсенді араласатын, тәжірибесі мен жауапкершілігі жоғары азаматтардың келуіне мүмкіндік береді.
Бүгінде қоғамның сұранысы да, азаматтардың мемлекеттен күтетін үміті де жоғары. Халықты толғандыратын әлеуметтік мәселелер, экономиканың дамуы, өңірлердің әлеуетін арттыру, білім мен денсаулық сақтау саласын жетілдіру, жастардың мүмкіндіктерін кеңейту, заң үстемдігін қамтамасыз ету сияқты бағыттар әрдайым күн тәртібінде тұр. Осындай маңызды мәселелерді көтеріп, олардың шешілуіне ықпал ету – жаңа Құрылтайдың негізгі міндеттерінің бірі.
Құрылтайдың тиімді жұмыс істеуі ең алдымен оның құрамына сайланатын депутаттардың кәсібилігіне, азаматтық ұстанымына және ел мүддесіне адалдығына байланысты. Әрбір депутат өз өңірінің ғана емес, тұтас Қазақстан халқының мүддесін қорғауға, қоғамдағы өзекті мәселелерді ашық көтеруге және олардың заңнамалық шешімін табуға үлес қосуы тиіс.
Осы ретте 23 тамыздағы сайлауға қатысу – әр азамат үшін маңызды мүмкіндік. Өз таңдауын жасау арқылы халық елдің болашағына қатысты ұстанымын білдіреді. Сондықтан сайлаушылардың саяси сауаттылығы мен азаматтық белсенділігі сайлау процесінің сапасына тікелей әсер етеді.
Құрылтай сайлауы – ел дамуының жаңа кезеңіне жол ашатын маңызды тарихи таңдау. Мемлекеттің болашағы тек қабылданатын заңдар мен мемлекеттік бағдарламаларға ғана емес, сонымен бірге қоғамның белсенділігі мен әр азаматтың жауапты таңдауына байланысты.
Сондықтан 23 тамызда әр азамат өзінің конституциялық құқығын пайдаланып, сайлауға белсенді қатысуы маңызды. Өйткені әрбір дауыс – елдің ертеңіне деген жауапкершіліктің көрінісі, ал саналы таңдау – тұрақты әрі әділетті қоғам құруға қосылған нақты үлес.
Құрылтай – халықтың үні мен елдің болашағын тоғыстыратын маңызды қадам. Ел тағдырына бейжай қарамай, тарихи таңдауға бірге атсалысайық!