Жетісу облысының жолаушылар көлігі және автомобиль жолдары биылғы жылдың жартыжылдығында атқарылған жұмыстарды қорытындылап, алдағы жоспарларымен бөлісті. Бүгінгі таңда облыстық маңызы бар жолдардың 95%-ы жақсы жағдайда. Ал осы көрсеткішті 96%-ға жеткізу үшін биыл бюджеттен тағы 49 млрд теңге бөлініп, 382 шақырым жол жөнделіп жатыр.
Мемлекет басшысының тапсырмасы аясында өңірдегі ең маңызды туристік және әлеуметтік нысандар қайта жаңғыртылуда. Атап айтқанда, Балқаш көлінің жағалауына апаратын «Алматы-Өскемен-Лепсі-Ақтоғай» автожолының 75 шақырымына 3 қабат асфальт толық төселіп, көлік қозғалысы қамтамасыз етілді. Қазіргі таңда жол жиегін абаттандыру жұмыстары жүріп жатыр. Сонымен қатар, атақты «Бұрхан бұлақ» сарқырамасына апаратын таулы жолды қайта жаңғырту жобасы басталып, биыл оған 1 млрд теңге бөлінді. Өңірдегі апатты деп танылған 15 көпірдің 5-еуі толық жөнделіп, қалған 10 көпірде құрылыс жұмыстары қарқынды жүргізілуде. Жол жөндеу жұмыстарының сапасын арттыру мақсатында арнайы 5 сатылы бақылау жүйесі енгізіліп, ауыр жүк көліктерінің салмағын бақылайтын 4 автоматтандырылған өлшеу жүйесі іске қосылды.