Жиында, өңірдің бас тәртіп сақшысы облыстық полиция департаментінің атқарған жұмысын қорытындылап, басым міндеттерін айқындады.
Құқық қорғаушылардың жиынына департамент бастығының орынбасарлары, басқарма басшылары, сондай-ақ облыстың аудандық және қалалық полиция бөлімшелерінің жетекшілері қатысты. Кеңес барысында есепті кезеңдегі қызмет нәтижелері қаралып, халықпен өзара іс-қимылды нығайту, жергілікті жерлердегі жұмыстың тиімділігін арттыру және жеке құрамға бақылауды күшейту мәселелері талқыланды. Сонымен қатар ішкі істер органдары қызметіне цифрлық технологияларды енгізу, заманауи жұмыс тәсілдерін дамыту және мемлекеттік қызметтердің сапасын арттыру бағыттарына ерекше назар аударылды. Жиында өңір полициясының оң нәтижелері де атап өтілді.
Сарқытбай Зәкірұлының айтуынша, жыл басынан 23 жедел-профилактикалық іс-шара өткізілген. Сондай-ақ, профилактикалық кабинеттерге 2576 азамат жеткізіліп, түсіндіру жұмыстары жүргізілген. Бас полицейдің сөзінше, өңірде құқық қорғаушылар тұрақты түрде халықпен кездесулер өткізіп, профилактикалық түсіндіру жұмыстарына ден қойған. Сонымен қатар, цифрлық технологиялар мен бейнебақылау жүйелерін, сондай-ақ, «Ekin Patrol» кешендерін енгізу нәтижесінде өңірде жыл сайын мыңнан астам құқықбұзушылықтың жолы кесілуде. Қазіргі таңда полиция жұмысында 519 бейнебақылау камерасы қолданылуда. Технологиялық мүмкіндіктің нәтижесінде қоғамдық қауіпсіздік күшейген. Қабылданған шаралардың нәтижесінде жол-көлік оқиғаларының саны 20,9%-ға азайған. Жиында түнде малдың жолға шығып кетуінен болатын жол апаттарын азайту мәселесі де сөз болды. Бас полицей жол қауіпсіздігін қамтамасыз ету мақсатында түлік атаулыға жарық шағылыстыратын таспалар тағу тәжірибесін енгізу мәселесін де сөз етті.
Өңір тәртіп сақшылары интернет-алаяқтыққа қарсы қарымды қарекет етуде. Тіпті, ауыз толтырып айтуға болады. Мәселен, аталған санаттағы қылмыстарды ашу көрсеткіші 61,8%-ға жеткен. Сонымен қатар, 500-ге жуық қауіпті интернет-ресурс бұғатталған. Есірткі қылмысымен күресте де құқық қорғаушылар білек сыбана жұмыс істеуде. Мәселен, жақында екі есірткі зертханасының қызметі әшкереленіп, тоқтатылған. Заңсыз айналымнан 97 келіден астам есірткі заты тәркіленді. Есірткі қылмысына қарсы тиімді әрекет – профилактика. Бұл ретте де заң өкілдері аянып жатқан жоқ. Әсіресе, кәмелетке толмағандар арасында профилактикалық жұмыстар күшейтілген. Өткен кезеңде 550 рейд ұйымдастырылып, білім беру ұйымдарында 498 дәріс өткізілген. Жиында департамент басшылығы Ішкі істер министрі Ержан Саденовтің қоғамдық қауіпсіздікті нығайту, тәртіпті күшейту және полиция қызметін жетілдіруге қатысты тапсырмаларын жеткізді.
– Полицияның міндеті – халық сенімі, азаматтардың өтініштеріне жедел әрекет ету және құқықтық тәртіпті қамтамасыз ету. Әрбір басшы қызметтік тәртіпті, халықпен жұмыстың сапасын және цифрлық шешімдерді енгізуді тұрақты бақылауда ұстауы тиіс, – деді Сарқытбай Құсайынов.
Кеңес қорытындысы бойынша бөлімше басшыларына облыс аумағында қызмет тиімділігін арттыруға және заңдылықты нығайтуға бағытталған нақты тапсырмалар жүктелді.
Дастанбек САДЫҚ