Жаңа ережелерге сәйкес, бұл бағдарламаға қатысқысы келетін жұмыс берушілерге қойылатын талаптар айтарлықтай күшейтілді. Жеке кәсіпкерлер мен Шаруа қожалықтар өтінім бергенге дейін кемінде он екі ай бойы нақты қызмет атқарған болуы шарт. Сондай-ақ олардың жалақы бойынша мерзімі өткен берешегі болмауы, салық пен әлеуметтік төлемдерді уақытылы аударып отыруы тиіс. Ең басты жаңалықтың бірі — кәсіпкерлер өткен жылы осы бағдарламамен уақытша жұмыс істеген жұмыссыз азаматтардың кемінде он пайызын, бірақ ең кемі бір адамды өз мекемесіне тұрақты жұмысқа алып қалуға міндеттеледі. Бұл талап уақытша жұмыс істеген тұрғындардың кейін тұрақты нәпақа табуына мүмкіндік береді.
Сонымен қатар өтінім беру және жұмысқа орналасу рәсімдері де нақтыланды. Кәсіпкерлер бос жұмыс орындарын ашуға өтінімдерін тек Enbek.kz электрондық еңбек биржасы арқылы жолдай алады. Келесі жылға арналған өтінімдер жыл сайын желтоқсан айының жиырмасы мен отызы аралығында қабылданса, ағымдағы жылға өтінім беру ақпаннан қыркүйектің соңына дейін жалғасады. Жұмыс іздеп жүрген тұрғындар да аталған интернет порталы арқылы бос орындарға өз бетінше өтініш бере алады, ал желіні қолдана алмайтын азаматтарға Мансап орталығының мамандары көмектеседі. Жұмыс беруші өзіне жолдама түскен күннен бастап үш жұмыс күні ішінде азаматты жұмысқа қабылдау немесе бас тарту туралы нақты шешім қабылдауы тиіс. Егер кәсіпкер жариялаған бос жұмыс орны тоқсан күн ішінде толтырылмаса, ол орын автоматты түрде жойылып кетеді.
Мемлекеттік қолдаудың басты мақсаты — азаматтарға тек уақытша табыс тауып қана қоймай, кәсіби тәжірибе жинақтап, еңбек нарығында өз орнын табуға жағдай жасау. Кербұлақ ауданының Мансап орталығы аудан тұрғындарын жұмыспен қамту және жұмыс берушілермен өзара байланыс орнату бағытындағы жұмыстарды белсенді жалғастыруда. Ауданымыздағы кәсіпкерлерді субсидияланатын жұмыс орындарын ұйымдастыруға белсенді қатысуға, ал жұмыс іздеген тұрғындарды мемлекеттік мүмкіндіктерді тиімді пайдалануға шақырамыз. Толық ақпарат алу үшін Кербұлақ ауданының Мансап орталығына жүгінуге немесе Enbek.kz сайтын пайдалануға болады.
Кербұлақ ауданының Мансап орталығы филиалының директоры
Құдайберген Анар Жанатқызы