Бүгінде құрылтайда айтылған мәселелер әрбір қазақстандықтың өмірімен тығыз байланысты. Білім сапасы, денсаулық сақтау, заң мен тәртіп, ауылдың дамуы, жастар тәрбиесі, ұлттық құндылықтарды сақтау – мұның бәрі күнделікті өмірде кездесетін мәселелер. Сондықтан құрылтайда көтерілген әрбір ұсыныстың қоғам үшін маңызы зор.
Әсіресе ауылдың жағдайына қатысты мәселелердің жиі қозғалып жүргені көңіл қуантады. Өйткені елдің берекесі – ауылдың тынысымен өлшенеді. Ауылда жұмыс болса, жастарға мүмкіндік жасалса, әлеуметтік нысандар дамыса, елді мекендердің де болашағы нық болмақ. Бұл – Кербұлақ өңірінің тұрғындары үшін де өзекті тақырып.
Құрылтайдың тағы бір ерекшелігі – ұлттық құндылықтарға басымдық берілуі. Ана тіліне құрмет, кітап оқу мәдениетін қалыптастыру, отбасы тәрбиесін нығайту, еңбекқорлықты дәріптеу – бәрі де ұлттың болашағына қызмет ететін құндылықтар. Осындай мәселелердің ашық айтылып, нақты бастамаларға ұласуы қоғамның дамуына оң әсерін тигізеді.
Әрине, кез келген өзгеріс уақытты талап етеді. Дегенмен маңыздысы – мәселенің көтеріліп, оған бейжай қарамайтын азаматтардың пікірінің ескерілуі. Халық пен биліктің арасында ашық диалог болған жерде сенім де нығаяды.
Ұлттық құрылтай – бір күндік жиын емес. Ол – елдің болашағына қатысты ортақ жауапкершілікті сезінуге үндейтін маңызды алаң. Әр айтылған ұсыныс, әр көтерілген мәселе нақты іске айналғанда ғана оның шынайы нәтижесін халық сезіне алады.
Аружан МОЛДАБЕК