Сотқа дейінгі тергеп-тексеру барысында күдіктінің жабайы жануарларды аулауға қажетті рұқсаты болмағаны анықталды. Соған қарамастан ол заңды түрде тіркелген ойық ұңғылы қаруды пайдаланып, сібір еліктеріне бірнеше рет оқ атқан.
Заңсыз аңшылық салдарынан екі сібір елігі ауланған. Күдікті жануарларды бөлшектеп жатқан кезде құқық қорғау органдарының қызметкерлері оны оқиға орнында ұстады.
Жетісу облыстық орман шаруашылығы және жануарлар дүниесі аумақтық инспекциясының мәліметінше, мемлекетке келтірілген материалдық шығын көлемі 3,2 миллион теңгеден асады.
Қазіргі уақытта қылмыстық іс бойынша тергеу аяқталып, іс материалдары мәні бойынша қарау үшін прокуратураға жолданған.
Полиция азаматтарды табиғат қорғау заңнамасының талаптарын сақтауға шақырып, заңсыз аңшылық жануарлар дүниесіне елеулі зиян келтіретінін ескертті. Сондай-ақ мұндай құқық бұзушылықтар үшін Қазақстан Республикасының заңнамасына сәйкес қылмыстық жауапкершілік қарастырылған.