2026 жылғы 1 шілдеден бастап күшіне енген Жаңа Конституция азаматтардың денсаулығын қорғауға бағытталған мемлекеттік кепілдіктерді одан әрі күшейтіп, сапалы әрі қолжетімді медициналық көмекті қамтамасыз етуге жаңа мүмкіндіктер ашты. Осыған орай Кербұлақ ауданында денсаулық сақтау саласында атқарылып жатқан жұмыстар туралы Кербұлақ аудандық орталық ауруханасының директоры Нұрманбетова Жанета Наримановнамен сұхбаттасқан едік.
— Жанета Наримановна, Жаңа Конституция денсаулық сақтау саласына қандай серпін берді?
— Жаңа Конституция азаматтардың денсаулығын қорғауды мемлекеттік саясаттың басым бағыттарының бірі ретінде айқындайды. Конституциялық реформалар аясында халыққа көрсетілетін медициналық көмектің қолжетімділігі мен сапасын арттыруға, медициналық ұйымдардың материалдық-техникалық базасын нығайтуға, инфрақұрылымды жаңғыртуға және кадрлық әлеуетті күшейтуге ерекше көңіл бөлінуде. Бұл бағыттағы жұмыстар Кербұлақ ауданында да жүйелі түрде жүзеге асырылып келеді.
— Кербұлақ ауданында медициналық инфрақұрылымды дамыту бағытында қандай жұмыстар атқарылуда?
— Медициналық көмектің қолжетімділігін арттыру мақсатында Кербұлақ ауданының ауылдық елді мекендерінде 17 жаңа медициналық нысан салынды. Бұл нысандар ауыл тұрғындарының тұрғылықты жеріне жақын жерде алғашқы медициналық-санитариялық көмекті дер кезінде әрі сапалы алуына мүмкіндік беріп, шалғай елді мекендердегі медициналық қызметтің қолжетімділігін едәуір арттырды.
Сонымен қатар, Кербұлақ аудандық орталық ауруханасының стационарлық ғимараты күрделі жөндеу жұмыстарынан өтуде. Жөндеу аяқталғаннан кейін аудан тұрғындарына заманауи талаптарға сай, жайлы әрі қауіпсіз жағдайда медициналық көмек көрсетуге мүмкіндік туады. Бұл медициналық қызмет сапасын арттырып, тұрғындардың сапалы ем алуына қолайлы жағдай қалыптастырады.
— Медициналық кадрлармен қамтамасыз ету бағытында қандай жұмыстар жүргізілуде?
— Денсаулық сақтау саласындағы негізгі басымдықтардың бірі – білікті кадрлармен қамтамасыз ету. Осы мақсатта ауданға дәрігерлерді тарту жұмыстары тұрақты жүргізілуде. Соңғы уақытта Кербұлақ ауданына 15 білікті дәрігер келді, олардың 8-і бейінді мамандар. Бұл аудан тұрғындарының қажетті мамандандырылған медициналық көмекті өз ауданында алуына мүмкіндік беріп, көрсетілетін медициналық қызметтің сапасы мен қолжетімділігін арттыруға оң ықпал етуде.
— Ана мен бала денсаулығын қорғау бағытындағы көрсеткіштер қандай?
— Ана мен бала денсаулығын қорғау – денсаулық сақтау саласының басым бағыттарының бірі. Қабылданып жатқан кешенді шаралардың нәтижесінде аудан бойынша ана өлімі тіркелген жоқ, ал бала өлімінің көрсеткіші өткен жылдармен салыстырғанда төмендеді. Бұл көрсеткіштер көрсетілетін медициналық көмектің сапасы мен тиімділігінің артып келе жатқанын көрсетеді.
— Кербұлақ ауданы тұрғындарына айтар негізгі үндеуіңіз қандай?
— Жаңа Конституцияда айқындалған әлеуметтік кепілдіктерді басшылыққа ала отырып, Кербұлақ аудандық орталық ауруханасы алдағы уақытта да халық денсаулығын нығайту, медициналық қызметтің қолжетімділігі мен сапасын арттыру, материалдық-техникалық базаны жетілдіру және білікті кадрлармен қамтамасыз ету бағытындағы жұмыстарды жалғастыра береді. Біздің басты мақсатымыз – әрбір аудан тұрғынына тұрғылықты жеріне қарамастан сапалы, қауіпсіз, қолжетімді және уақытылы медициналық көмек көрсету арқылы Конституцияда кепілдік берілген азаматтардың денсаулығын қорғау құқығын толық қамтамасыз ету.