Жерде бала қуанса…

«Балалық шақ – патшалық тақ» деп бекер айтылмаса керек. Өйткені қайғысыз, мұңсыз, ата-ананың қамқорлығында жүретін балалар шынымен де бақытты.
Осыған орай 1950 жылы 1 маусым балалар күні деп белгіленген болатын. Жыл сайын балаларға қуаныш сыйлайтын бұл мереке аудандық жұмыспен қамту және бағдарламалар бөлімінің ұйымдастыруымен біздің ауданымызда да аталып өтті.
Мүмкіндігі шектеулі балалар бөлімінің ұйымдастыруымен өткен «Балалық шақтың бал күні» атты іс-шараға аудандық мәслихаттың хатшысы Бөкен Қабиұлы Рысбеков, аудан әкімінің орынбасары Болысбай Тоғысбайұлы Момбаев, аудандық «Ардагерлер кеңесінің» төрағасы, Алматы облысының, Кербұлақ ауданының Құрметті азаматы Төленді Оспанбайұлы Сарыбаев, еңбек ардагері, Кербұлақ ауданының Құрметті азаматы Бақтыгерей Жетпісбай, ауданымыздағы мүмкіндігі шектеулі балалар мен олардың ата-аналары, жергілікті БАҚ өкілдері қатысты.
Мерекеге сай безендірілген аудандық жұмыспен қамту және әлеуметтік бағдарламалар бөлімінің ауласы мерекелік костюмдер киген ертегілер кейіпкерлері мен жүздеріне қуаныш ұялаған балаларға лық толды.
Алғашқы сөз кезегін аудан әкімінің орынбасары Болысбай Момбаев алды.
-Құрметті мерекеге жиналған қонақтар, балалар! Бала-біздің болашағымыз. Биылғы мереке Астананың 20 жылдық мерейтойымен тұспа-тұс келіп отыр. Елбасымыз Нұрсұлтан Әбішұлының сарабдал саясатының арқасында елімізде барлық бала бақытты өмір кешуде. Балалардың құқығы бірдей қорғалады. Мүмкіндігі шектеулі балаларға осындай үлкен мереке ұйымдастырып отырған аудандық жұмыспен қамту және бағдарламалар бөлімінің басшысы Айгүл Тұрдақынқызына рахмет,-деп аяқтады сөзін.
Сөз тізгінін алған аудандық мәслихаттың хатшысы Бөкен Қабиев, «Ардагерлер кеңесінің» төрағасы Төленді Сарыбаев, еңбек ардагері Бақтыкерей Жетпісбай балаларды мерекемен құттықтап, ізгі тілектерін білдірді. Бөлімнің әлеуметтік қызметкерлері мен балалардың күшімен қойылған концерттік бағдарлама көпшіліктің көңілінен шықты. Әсіресе, балалардың Астана туралы оқыған балаң жырлары, мың бұрала орындаған билері, елімізде қоныстанған түрлі ұлт өкілдерінің татулығын паш ететін көріністері мерекенің сәнін келтірді.
Мерекені аудандық жұмыспен қамту және әлеуметтік бағдарламалар бөлімінің басшысы Айгүл Диханбаева қорытындылап, 1 маусым балаларды қорғау күні жыл сайын өткізіліп тұратынын, бұл шараға арнайы қаржы бөлінбесе де мүмкіндігі шектеулі балалар бөлімінің, әлеуметтік қызметкерлердің ұйымдастыруымен бұл күн атаусыз қалмайтынын тілге тиек етіп, Айнагүл Рахымжанқызына алғыс айтып, мүмкіндігі шектеулі балалар саны азайсын деген тілегін жеткізді.
Балалардың ата-аналары атынан Алтыншаш Тұрсынбаева, Гүлзира Рамазановалар сөз алып, Алланың жазуымен мүмкіндігі шектелген балаларына осындай іс-шара ұйымдастырып, мерекелік көңіл-күй сыйлаған бөлім қызметкерлеріне аналық ақ тілектерін білдірді.
Шара соңында балаларға тәттілер, сыйлықтар таратылып, балдырғандар үшін сурет салу байқауы, спорттық ойындар ұйымдастырылып, арнайы жайылған дастарханнан дәм татысты.
«Жерде бір бала қуанса, көкте мың періште шаттанады» деген қасиетті сөз бар дана халқымызда. Іс-шараның түпкі мақсаты-көңілдерінде қаяу бар балаларға мерекелік көңіл-күй сыйлау, оларда барлық балалар секілді бақытқа лайық екенін ұғындыру, қоғамда өз орындары бар екенін сезіндіру болатын. Бұл мақсат орындалды. Өйткені ортаға шығып билеп, ән айтып шаттанған балалардың жүзіндегі қуанышты ештеңемен салыстыруға болмайтын еді. Мүмкіндігі шектеулі балалардың бір күнгі қуанышына демеушілік көрсететін атпал азаматтардың да болмағанын естігенде айтатын сөз таппадық.
Осы жерде балалардың күшімен қойылған «Алтын балық» ертегісіндегі кейіпкердің сөзі мені толғандырды. Алтын балық өзін ұстап алған балаға «үш тілек айт орындайын» дейді. Сол кезде бала, бірінші тілегім-бүкіл әлемнің балалары бақытты болсын, ауырмасын, жыламасын. Екінші тілегім-өздігінен жүре алмайтын досыма-мүгедектің арбасы табылсын. Үшінші тілегім-мүмкіндігі шектеулі балалардың құқы бұзылмай, басқа балалармен тең болсын аналары әрдайым қасында болып, олар сауығып кетсін. Адамдардың бәрі осыған атсалыссыншы дейді сәби-тілек. Бұл тілекке алып қосарымыз болмады.
«Балалар — жүрек жемісі, көздің нұры» дейді хадисте. Ендеше, Алла-Тағала балаларға әрдайым қорған болсын. «Бар жақсылық балаларға», «Бала-біздің болашағымыз» деген сөздер жәй ұран болып тасада қалып қалмасын деп тіледік іштей.
Дина АМАНҚЫЗЫ