«Әділет» партиясы су үнемдеу технологияларын қолдану көлемін арттырады

Ашық пікір алмасумен басталған жиында штаб төрағасы Мемлекет басшысының Жолдауын таразылап, стратегиялық құжаттағы басым міндеттерге тоқталды. Айтуынша, Мемлекет басшысының Қазақстанды ауқымды құрылыс алаңына айналдыру жөніндегі тапсырмасы – елді мекендердің келбетін жаңартып қана қоймай, халыққа қажетті әлеуметтік және инженерлік инфрақұрылымды дамытуға бағытталған бастама. Мұнан соң Амангелді Есбай Партияның 2026–2031 жылдарға арналған өңірлік сайлауалды бағдарламасы туралы сөз етті.

– Партия қызметі бес негізгі құндылыққа негізделеді. Олар – әділеттілік, отансүйгіштік, еңбекқорлық, жауапкершілік, прогресс. Өңірлерді дамыту мен азаматтардың мүддесін қорғауға қатысты мәселелерді шешуде осы құндылықтарды басшылыққа аламыз, — деді Амангелді Есбай.
Оның айтуынша, партия ауыл шаруашылығын іргелендіруге нақты жоспарлы жұмыс жүргізбек. Өйткені, аграрлы өңірдің экономикасы сонда ғана әлеуетті болмақ.

– Өңір ауыл шаруашылығы өндірісін ұлғайтуға, өнімді қайта өңдеу көлемін кеңейтуге, суды үнемдейтін заманауи технологияларды енгізуге және ауылдағы кәсіпкерлікті дамытуға елеулі әлеуетке ие. Біз агроөнеркәсіптік кешен саласында 9 инвестициялық жобаны іске қосамыз. «Ауыл аманаты» бағдарламасы аясында ауыл тұрғындарының 648 кәсіпкерлік жобасын іске асырамыз, — деді штаб төрағасы.

Жиында серіктестік еңбеккерлері саяси ұйымның сайлауалды бағдарламасындағы бастамалар төңірегінде пікір алмасып, тағдыршешті науқанда «Әділет» партиясын қолдайтынын жеткізді.

Дайындаған: «Әділет» партиясы Жетісу облыстық филиалының баспасөз қызметі.
Тапсырыс беруші: Есбай А.Ғ.
Жетісу облыстық мәслихаты депутаттарының сайлауында партиялық тізімді ұсынған «Әділет» партиясы» ҚБ сайлау қорының қаражатынан төленді.