Жетісу жастарына жаңа жоба

Брифингке Jetisy Jastary коммуналдық мемлекеттік мекемесі басшысының міндетін атқарушы Арнай Байжурынов пен «Өрендер» академиясы қоғамдық бірлестігінің төрағасы Бақыт Қалиева қатысты. Спикерлердің айтуынша, жоба «Азаматтық бастамаларды қолдау орталығы» КЕАҚ гранты аясында ішкі саясат басқармасының тапсырысымен жүзеге аспақ. Негізгі бағыт – студенттік өзін-өзі басқару жүйесін біріздендіріп, өңір көлемінде ортақ үйлестіру кеңістігін қалыптастыру.

Бастама аясында Жетісу облысының сегіз ауданы мен екі қаласындағы бір жоғары оқу орны және кемінде жиырма екі колледж қамтылады. Жоспар бойынша мыңнан астам студент жобаның тікелей қатысушысына айналмақ. Бұл – жастардың қоғамдық белсенділігін арттыруға, басқарушылық қабілетін шыңдауға арналған ауқымды алаң.

Бақыт Асанқызының сөзінше, көптеген білім ордаларында студенттік кеңестердің жұмысы әркелкі деңгейде ұйымдастырылған. Бір жерде жүйелі тәжірибе қалыптасса, енді бірінде ұйымдық байланыс әлсіз. Осы олқылықтың орнын толтыру үшін «STUDENT HUB ZHETISU» жобасы өңірлік бірыңғай модель ұсынбақ. Жоба шеңберінде студенттік ұйымдардың ортақ құрылымы жасалып, жұмыс регламенттері мен үлгілік құжаттар әзірленеді. Сонымен қатар тұрақты консультациялық кездесулер, тәжірибелік семинарлар мен заманауи тренингтер өткізу жоспарланған.

Талдықорған қаласында арнайы «STUDENT HUB ZHETISU» облыстық қолдау орталығы ашылады. Бұл орталық студенттік кеңестерге әдістемелік әрі ұйымдастырушылық көмек көрсететін тұрақты орталыққа айналмақ. Мұнда жастар өз жобаларын ұсынып, тәжірибе алмасып, кәсіби менторлардан кеңес алады.

Мамандардың айтуынша, жобаның басты жаңалығының бірі – цифрлық платформаның іске қосылуы. Аталған жүйе арқылы студенттік ұйымдардың бірыңғай базасы қалыптасып, Student Activity Index рейтингтік бағалау тетігі енгізіледі. Ай сайынғы мониторинг жүргізіліп, жастар бастамаларының тиімділігі сараланады. Бұдан бөлек, шағын гранттар модулі мен жобалар банкі жұмыс істеп, студенттердің тың идеяларын қолдауға мүмкіндік береді.

Ұйымдастырушылардың айтуынша, кемінде отыз шағын бастамаға менторлық және әдістемелік сүйемелдеу көрсетіледі. Әлеуметтік жобалар, еріктілер қозғалысы, құқықтық сауаттылық, жастар көшбасшылығы мен азаматтық белсенділік бағытындағы ұсыныстарға басымдық беріледі.

Өңір көлемінде интеллектуалдық турнирлер, дебат лигалары, цифрлық кейс чемпионаттары, азаматтық квест-марафондар және TED форматындағы байқаулар өткізу көзделген. Мұндай шаралар студенттердің шешендік қабілетін ұштап, сыни ойлау мәдениетін қалыптастыруға ықпал етеді.

Жоба аясындағы ауқымды іс-шаралардың бірі – «STUDENT LEADER CAMP ZHETISU – 2026» көшбасшылық лагері. Онда белсенді жастар бас қосып, жобалық менеджмент, жастар саясаты және қоғамдық бастамаларды жүзеге асыру бағытында тәжірибе бөліспек. Ал «Жетісу студенттері – 2026» фестивалі студенттік ұйымдардың бірлігі мен серпінін айшықтайтын алаң болмақ.

                                                                                                                                                       Санжар СҰЛТАНҒАЗЫ