Отан отбасынан басталады.

Сәмен батыр кесенесінің  жанындағы 5-6 бөлмелік үлкен үй батыр қолданған заттармен толықтырылып қойылған. «Батырдың тікелей ұрпақтары салған үлкен кесененің жанындағы ғимаратты жергілікті халық мұражай  деп атап кеткен. Бұл жерге келіп,  бөлмелердегі жәдігерлерді қызығушылық танытып,  көрушілер аз емес. Сондықтан да болашақта бұл ғимаратқа ата атындағы мұражай деп арнайы атау берілсе. Мұражайды қадағалап,  келушілерді таныстырып отыратын адам болса нұр үстіне нұр болар еді. Бабаларымыз, батырларымыз туралы кейінгі ұрпақ білмейді, оқушыларымыздың тарихпен танысуына, жәдігерлерді көздерімен көруге мүмкіндік туар еді,- дейді  ауыл тұрғындары.

Бөлмелердегі жәдігерлермен Жоламан орта мектебінің оқушылары таныстырды.

Жетісу облысының барлық аудандарынан келген Аналар  бас -аяғы жиырма шақты отбасы тұратын мекенжайда осыншама құнды дүниелердің, тарихи мұралардың

сақталып тұрғанына риза болып, ауыл басшыларына, тұрғындарға ризашылықтарын білдірісіп жатты.

Форум Жоламан ауылының мәдениет үйінде жалғасын тапты.

Қашанда қонақжай халқымыз бұл жолы да сол жақсы тәрбиесінен танбады. Қонақтарды  ауладан ән мен жырмен қарсы алды. Ауылдық округтің әкімі Жанаберлинов Азамат Бейсенбайұлы келген қонақтарға ауылдық округ  туралы туралы айтып,   тарихына тоқталды.

Қонақтар мәдениет үйінің ауласында есіктен төрге дейін қатарластыра қойылған көрмемен танысып, таңдай қағысты. Ауылдағы шеберлердің қолынан шыққан әрбір зат көздің жауын алып, көңілге қуаныш силайды. Аналардың қол өнер көрмесі, «Ауыл жәрмеңкесі», аудандық аналар кеңесінің 11 жыл бойы атқарған жұмыстарының нәтижесі бойынша  ұйымдастырылған бұл  көрме, ауданда талай игілікті істердің атқарылғанын паш еткендей.

Мәдениет үйіндегі салтанатты шарада аудан әкімінің орынбасары Әденов Нұрлан Бақтыбайұлы құттықтау сөз сөйледі. Кезек марапаттау рәсіміне беріліп,   ауданымыздың 15 округінен келген үлгілі отбасыларына, атап айтқанда

Сарыөзек ауылынан, отасқандарына 19 жыл болған, бүгінде  4 бала тәрбиелеп өсіріп отырған Пермухаметов Алмас Ахметжанұлы мен жұбайы Пермухаметова Динара Ертарғынқызына, Шанханай ауылынан отасқандарына   17 жыл болға, 5 баланың ата –анасы   Қасымов Руслан Мейірханұлы мен жұбайы Нусипова Мадина Берікқызына, Алтынемел ауылдық округінен отасқандарына 23 жыл болған, 3 бала тәрбиелеп отырған   Анапиянов Нұрлан Аділханұлы мен жұбайы Мақұлбаеаа Назира Жасқадырқызына,  Қызылжар ауылдық округінен отасқандарына 33 жыл, 4 балалы отбасы иелері  Ақшолақов Әбілхан Абдыманұлы мен жұбайы Далабаева Ләззат Қасенжанқызына, Жоламан ауылдық округінен    отасқандарына 18 жыл болған,  5 баласы бар   Мұсабаев Талғат Мұратұлы мен  жұбайы Мұсабаева Назым Жеңісқызына,  Қаспан ауылдық округінен отасқандарына 46 жыл болған,  4 бала тәрбиелеп өсірген   Тоқабаев Сламбай Нұраділұлы мен жұбайы Токабаева Еркежан Сейтрахимқызына, Қарашоқы ауыл округінен  отасқандарына  22 жыл болған, 6 баланың ата-анасы   Естемесов Данияр Нұралиұлы мен жұбайы Чинкисбаева Динара Алтынбекқызына, 39 жыл бірге тұрып, үш баланы тәрбиелеп өсірген басшилік Омаров Асхат Мұхатайұлы мен жұбайы Жиенқұлова Нұрғалипа Қыдырбайқызына, отасқандарына 14 жыл болған, 6 баланың ата-анасы  көксулық  Аманбаев Ерназар Қожабекұлы мен  жұбайы Кашкеева Найля Мейрамханқызына,  сарыбұлақтық отасқандарына 29 жыл болған Ақылбай Талғат Ақылбайұлы мен жұбайы Ақылбай Шынар Ильясқызына, Жайнақ батыр ауылдық округінен өмірдің қызығы мен қуанышын бірге бөлісіп келе жатқан жайнақтық Кайымбеков Алимбатыр,  жұбайы Кайымбекова Мейрамгүлге, 46 жылдық бірлескен өмірі бар талдыбұлақтық  Жүниспаев Өмержан Валиұлы мен жұбайы Жүниспаева Куляш Алиасқарқызына, Шұбар ауылдық округінен  6 баланың ата –анасы  Нұрбаев Серік Амандосұлы мен  жұбайы Нұрбаева Жанар Нұртайқызына және Қоғалы ауылдық округінен отасқандарына 15 жыл болған 4 баланың ата-анасы  Искаков Дамир Барлыбекұлы мен  жұбайы Алимжанова Жұлдыз Мадығалиқызына   аудан әкімі Ж.Жүнісбековтің    Алғыс хаты мен  бағалы силықтарын   табыс етті.

Келесі  кезекте сөз кезегін алған Жетісу облыстық Аманат партиясы Кербұлақ аудандық филиалының төрағасы Камамбаева Гүлжан Алтынбекқызы форумға қатысушыларды партия атынан отбасы күні мерекесімен құттықтап, бірқатар аналарды  «Аманат» партиясы қатарына қабылдап, партиялық билеттерін тапсырды.

Облыстық Аналар кеңесінің төрағасы Баймадиева Жамал Қасымбекқызы сөз алып, бүгінгі өтіп жатқан форумның маңыздылығына тоқталып, облыс бойынша аналардың атқарып жатқан жұмыстары туралы айтып өтті. Ынтымағы жарасқан, өз істерімен өзгелерге үлгі болып жүрген,   халқымыздың санын көбейтіп, сол өмірге келген балаларына жақсы тәлім-тәрбие беріп, аянбай тер төгіп жүрген бүгінгі 15 округтен келген жанұялық жұптарға сәттілік тіледі.

Форумада Шанханай ауылдық округі аналар кеңесінің төрағасы Толыбаева Ләззат Аязбайқызы «»Отбасы құндылықтары  тақырыбында мәнді де мағыналы баяндама жасап, өзі басқарып отырған ауылдық округтегі аналар кеңесінің атқарған жұмыстарына тоқталды.

Форумға қатысушылар  Жоламан ауылдық округінің   әжелері    дайындаған  арнайы концертті тамашалап, көңілдерін бір серпілтті. Мектеп оқушыларының қойған «Кешір ана» қойылымы талайдың жанарына жас ұялатты. Жалғыз ұлды өсіремін, қапнаттыға қақтырмаймын, тұмсықтыға шоқыттырмаймын деп, жас өмірін баласының бақытына арнаған ана,  келінінің бейпіл сөздеріне, іс әрекетіне  көніп  жүрген-тін . Алайда бейпіл ауыз келінге бұл да  жақпай, жолдасына шарт қойып, ақыры  Қарттар үйіне өткізіп тынады.

Жолдасының қарт анасынан құтылған келін көңілденіп отбасына шай беріп отырғанда  ұлдарының  «үлкейгенде мен де сендерді қарттар үйіне өткіземін» дегені келіннің қуанышын су сепкендей басады.  Баласының сөзінен кейін қателіктерін түсініп, анасын қарттар үйінен алуға барады…

Өкінішке орай, өмірде болып жатқан жай, ащы шындық. Оқушылар  кәнігі актерлардай  көрерменге жеткізе білді. Қойылым діттіген жеріне жетті.

Ақ кимешегін кір шалмаған Әжелер ансамблінің жанды дауыста шырқаған «Ел аман болсын!», «Ауылым», «Көк өрік» , «Ақ кимешек», «Той базар», Жұмакүл Дуншебаева, Дәметкен Жұмашеваның орындауындағы  «Көп қарадым суретіңе»,  Гүлнар Жүніспаеваның орындауындағы  «Балапан қаз»,  «Тұғыр» тобының орындауындағы «Киелі Кербұлағым», Рахымжанов Дәулетханның орындауындағы «Сәйгүлік» әні  көпшілік көңілінен шықты

Форумда ән де айтылды, би де биленді. Бір –біріне арналған жүректен шыққан жақсы тілектер қаншама?!

Залда отырған көрермен де қарап қалмай  ауыл өнерпаздарының әніне бірге биледі.

Бұл форумға  келген қонақтар, ауыл тұрғындары бір серпілгені анық.

-Залда отырған ауыл тұрғындарының көбісі өмірді көрген, үлкен кісілер екен. Қап, шіркін осы концертті, қойылымды ауыл жастарының көрмегені-ай. Мән –мағынаға толы осындай жиындарға жастарды да шақыру керек, біздің болашағымыз солар ғой, көріп, үйренері көп  форум екен,-

дескендер де болды.

Рас, форумның берері мол болды. Талай жанға ой салғаны анық.

«Отан отбасынан басталады»-дейді. Ендеше, Отанымызды,  отбасымызды жақсы көрелік. Әрбір жүрек  Отаным деп лүпілдеп, Отаным деп  соқсын!

Ләйлә ЕСКЕНДІРҚЫЗЫ