Жетісу облысында шомылу маусымына арнайы 4 орны белгіленді

Биыл өңірде азаматтардың қауіпсіздігі үшін ресми 4 орын белгіленді: Талдықорған қалалық жағажайы, Алакөл жағалауындағы Ақши мен Көктұма ауылдары және Сарқан ауданындағы Балқаш көлі.

Мамыр айының соңына дейін демалыс орындары мен лагерьлердегі су түбін тазарту жұмыстары толық аяқталады. Бүгінгі таңда қауіпті учаскелерде 190 тыйым салу белгісі орнатылып, Төтенше жағдайлар департаменті 25 жүзу құралымен және 45 құтқару жабдығымен толық қамтамасыз етілді. Сонымен қатар, жергілікті бюджеттен қосымша техника мен құрал-жабдықтар алуға 4,7 миллион теңге бөлінді.

Маусым кезінде құтқарушылар күшейтілген жұмыс режиміне көшеді. Ақши мен Лепсі ауылдарында мамандар тәулік бойы кезекшілік етіп, жағалауды патрульдейді. Биыл басты назар құтқару мұнараларын орнату мен қауіпсіз шомылу аймақтарын белгілеуге аударылып отыр. Өткен жылы 5 адамның суға кетіп, 51 адамның жауапкершілікке тартылғанын ескерсек, биылғы қауіпсіздік шараларының маңызы өте жоғары.