«Жетісу әкелер мектебі» ауқымды әлеуметтік жобасы бастау алды

Жетісу облысында отбасы институтын нығайту мен әкелердің бала тәрбиесіндегі рөлін арттыруға бағытталған «Жетісу әкелер мектебі» әлеуметтік жобасы іске асырыла бастады. Жобаның басты мақсаты – өңірдегі кемінде 1000 әке мен ұл баланы қамти отырып, жауапты әке болу мәдениетін қалыптастыру және аймақтық қоғамдық тәлімгерлік институтының негізін қалау.
Жоба аясында облыстың 8 ауданы мен 2 қаласында ата-аналар комитеттері мен әкелердің қатысуымен 100-ден астам жүйелі кездесулер ұйымдастырылады. Бұл жиындарда ұл бала тәрбиесіндегі заманауи сын-қатерлер, әкенің құқықтары мен міндеттері және ер адамның мектеп өміріне белсенді араласу тәсілдері кеңінен талқыланбақ. Сонымен қатар, әке мен бала арасындағы эмоционалдық байланысты нығайту үшін өңір бойынша 30-ға жуық спорттық іс-шара мен арнайы отбасылық бағдарламалар өткізу жоспарланған.
Бастаманың ең ауқымды түйіні – облыстың түкпір-түкпірінен 500-ден астам делегаттың басын қосатын өңірлік Әкелер форумы болмақ. Форум аясында үздік әкелер марапатталып, озық тәрбиелік тәжірибелер ортаға салынады.