Еңбекпен шыңдалған жан

Уақыттың жүйріктігіне ешкімнің таласы жоқ. Алайда өткен өміріңе көз жіберген сәтте ізгіліктен қалған іздерің мен еленген еңбегіңнінңжемісін көруден асқан бақыт жоқ шығар, сірә?!

«Кісіні танымақ болсаң, ісіне қара» деген екен Жүсіп Баласағұни. Осындай атқарған еңбегімен ел құрметіне бөленіп жүрген, қоғамда ер адамдармен иық тірестіріп, ешқашан уақытпен санаспай басшылық қызметтер атқарып, ел экономикасын арттыруға сүбелі үлес қосып жүрген әйел қауымы қаншама?

Солардың бірі-Кербұлақ ауданының «Құрметті азаматы» Айнабекова Гүлжахан Нұрмұханқызы.

Сарыөзек кентінде қарапайым отбасында дүниеге келген Гүлжахан Нұрмұханқызы 1975 жылы Ленин орденді Қазақ теміржолының №270 мектебін ойдағыдай бітіргеннен кейін алғашқы еңбек жолын Кербұлақ аудандық партия комитетінің секторында кадр есебін жүргізуші статист қызметінен бастады. 1981 жылы С.М.Киров атындағы Қазақ мемлекеттік университетінің филология факультетін үздік бітіріп, орыс әдебиетінің оқытушысы мамандығын иеленді. Сол жылы аудандық партия комитетінің жолдамасымен Кербұлақ аудандық комсомол  комитетінің  ұйымдастыру бөлімінің меңгерушісі қызметіне тағайындалды. 1983 жылы ақпан айында жас коммунист Кербұлақ аудандық партия комитетінің ұйымдастыру бөліміне нұсқаушысы ретінде қабылданып, 1986 жылға дейін осы қызметті атқарды.

1986 жылдың шілде айында аудандық партия комитеті Бюросының жолдамасымен Кербұлақ аудандық атқару комитетінің хатшысы боп тағайындалды. Кербұлақ аудандық халық депутаттары Кеңесінің екі шақырылым депутаты болды. 1989 жылы екі ауданның қосылуына байланысты Сарыбұлақ орта мектебінің директоры қызметіне жіберіліп, 1992 жылдың ақпанына дейін аталмыш мектепті басқарды. 1992 жылдың ақпан айынан бастап аудандық әкімшілік аппаратына әкімнің орынбасарының референті қызметінде болып, аудан әкімі аппараты құрылғаннан кейін жалпы бөлімінің меңгерушісі ұйымдастыру бөлімінің бас маманы, ұйымдастыру кадрмен жұмыс бөлімінің және ұйымдастыру-АХАЖ бөлімінің басшысы қызметтерін атқарды. Осы уақыт ішінде Гүлжахан Нұрмұханқызы өзінің біліктілігімен, іскерлігімен, еңбекке қабілеттілігімен, уақытқа бейімділігімен бағалана білді. Өзіне тапсырылған істі мінсіз, үлкен абыроймен атқарған Гүлжахан Нұрмұханқызының еңбегі елеусіз болған жоқ. Уақытпен санаспай атқарған тынымсыз еңбегінің арқасында  2006 жылы Кербұлақ ауданының Құрметті азаматы атағын алды. Бұл абыройлы атақты ол өзі туып өскен өңірінің, қызметтестерінің махаббаты, алғысы деп біледі. Тәуелсіздік жылдары- Қазақстан Республикасының тәуелсіздігіне 20 жыл, «Қазақстан Республикасы Конституциясына 20 жыл» мерекелік медальдардың иегері, сондай-ақ Алматы облысы әкімінің Құрмет Грамоталарымен, бірнеше мәрте Кербұлақ ауданы әкімінің Құрмет Грамоталарымен марапатталған. Мұның бәрі еселі еңбектің нәтижесі болса да Гүлжахан Нұрмұханқызы үшін қызмет барысында қарапайым халықтан алған алғысының орны бөлек. «Бидайдың басын көтергені — дәнінің жоқтығы, басшының кеудесін көтергені ақылының аздығы» деген сөз бар қазақта. Қашан көрсең де сабырлы қалпынан таймаған қарапайым да кішіпейіл мінезімен ерекшеленетін Гүлжахан Нұрмұханқызын қалай мақтасақ та негіз бар.

2015 жылы құрметті демалысқа шықса да сүйікті жұмысынан қол үзген жоқ. Бүгінгі күні келісім-шарт бойынша Кербұлақ ауданы әкімі аппаратында жас мамандармен тәжірибе бөлісуде.

Жалпы 42 жылдық еңбек өтілінің барлығы да мемлекеттік қызметте өтіпті. Бұл  саналы ғұмырын осы жұмысына аранады деген сөз. Ендеше Гүлжахан Нұрмұханқызының жастарға айтар ақылы да, берер кеңесіде жетерлік.

Көзге көрінбейтін еңбектен, көзге көрінетін биіктің басталатыны осының айғағы шығар.

Кез-келген қасиет адам баласына әкенің қанымен, ананың сүтімен даритыны ақиқат. Бұл орайда Гүлжахан Нұрмұханқызының алған тәрбиесі мен тәлімі орасан зор. Өйткені әкесі-Айнабеков Нұрмұхан  Ұлы Отан соғысының ардагері болса, аяулы анасы – Тұрсынай Уәлиқызы тыл ардагері болған. Өмірдің қиын-қыстау кезеңінде кеудесін оққа тосып, елін, жерін қорғаған батыр әке мен ашқұрсақ болып жүріп «Бәрі де майдан үшін» деп ұрандатып, ертелі кеш ауыр жұмыстарды атқарып, баянсыз тірлікте-баянды ғұмыр кешкен ананың тәрбиесін алған ұл-қыздың өз елінің патриоты болмауы мүмкін емес еді. Өйткені ата-анасы ұрпағын еңбексіз бақыт, маңдай терсіз береке келмейтінін бала жастан саналарына сіңіріп өсірді. «Тәрбие басы-талбесік» деген осы да. Өйткені ғасырлар елегінен өтіп, сұрыпталып алынған саф алтындай тәрбие алған жан жақсы істерге бастайды.

«Істеп жүрген жұмысыңнан бақыт табамын десең, оның үш шарты орындалуы тиіс: біріншісі-атқаруға тиісті жұмысыңа шамаң келетін болсын, екіншісі-ол жұмысты ауырсынбайтын бол, үшіншісі-істеген жұмысыңның нәтижесі болсын» дейді шығыс даналығы. Осындай қағиданы ұстанған Гүлжахан Нұрмұханқызының өмірі мәнді де мағыналы.

-Өмір деген ағын су секілді екен. Көзді ашып-жұмғанша 60 деген асқаралы жасты еңсеріппін. «Көп еңбек еткенге бақыт басын иеді» деген сөздің жаны бар. Өткенге шегініс жасасам-жеткен әр белесім өмірімнің бір бөлшегі іспеттес. Қызметтің үлкен-кішісі болмайды. Тек жауапкершілігің жоғары болуы керек. Әр жұмысқа кіріскенде  ар алдында тұрғандай болам. Сондықтан шығар, еңбегімнің еленгені,-дейді Гүлжахан Нұрмұханқызы әңгіме арасында.

Иә, еңбекпен шыңдалған жан осылай дейді. Расында да бұл бақытын еңбектен тапқан адамның сөзі. Бүгінгі таңда еңбек жолдары, білімі мен біліктілігі жастарға үлгі боларлық Гүлжахан Нұрмұханқызына біз де өз тарапымыздан зор денсаулық, қажымас қайрат пен жасымас жігер тіледік.

                                                                                                Дина АМАНҚЫЗЫ.