Жетісу облысында көктемгі әскерге шақыру науқаны басталады

Жетісу облысында азаматтарды мерзімді әскери қызметке шақырудың кезекті науқаны биыл 16 наурыздан басталады. Бұл туралы Талдықорған қаласы Қорғаныс істері жөніндегі басқармасы және Жетісу облысы Қорғаныс істері жөніндегі департаментінің өкілдері айтты.
2025 жылы әскерге шақыру көктемгі және күзгі кезеңдерде жоспарлы тәртіппен жүргізілді. Биыл облыстан көктемгі шақыру науқанына 800-ден астам азамат шақырылса, Талдықорған қаласынан 200 азамат әскерге шақырылмақ. Олар Қазақстан Республикасының Қарулы Күштері, Ұлттық ұланы, Ұлттық қауіпсіздік комитетінің Шекара қызметі, Төтенше жағдайлар министрлігі және Мемлекеттік күзет қызметінің қатарын толықтырады.
Әскерге шақыру рәсімі халық үшін барынша ашық әрі ыңғайлы форматта ұйымдастырылған. Азаматтарға жеке шақырулар және 1414 бірыңғай байланыс орталығы арқылы SMS-хабарламалар жолданады. Сонымен қатар Қорғаныс істері жөніндегі департаменттердің электронды поштасы мен әлеуметтік желілердегі ресми парақшалары арқылы азаматтар қажетті ақпаратты жылдам әрі ашық ала алады. Мұндай шаралар халықпен тиімді қарым-қатынас орнатуға мүмкіндік береді.
Спикерлердің мәліметінше, әскерге шақыруды ұйымдастыру және өткізу жұмыстары тұрақты бақылауда болып, мүдделі мемлекеттік органдармен тығыз өзара іс-қимыл негізінде жүзеге асырылады. Ал әскерден жалтарғандарға жаза қарастырылған.