Латын әліпбиіне көшу — заман талабы

Жуырда аудандық Ә.Сарыбаев атындағы Мәдениет үйінде латын қарпіне көшу туралы кезекті жиналыс өтті. Жиынға Алматы облыстық тілдерді дамыту жөніндегі басқармасының басшысы Айдар Қарбозұлы Башпаев, «Нұр Отан» партиясы Алматы облыстық филиалы төрағасының бірінші орынбасары Ғалиасқар Төлендіұлы Сарыбаев, аудандық мәслихаттың хатшысы Рысбеков Бөкен Қабиұлы, аудан әкімінің орынбасары Қожахметов Серікбай Бәкенұлы қатысты. Алғашқы сөз Алматы облыстық тілдерді дамыту басқармасының басшысы Айдар Қарбозұлы Башпаевқа берілді.

— Елбасы Нұрсұлтан Назарбаев 2017 жылдың соңына дейін латын қарпіндегі қазақ әліпбиінің жобасын әзірлеуді ұсынып, үкіметке қазақ тілін латын әліпбиіне көшірудің нақты кестесін жасауды тапсырған болатын. Ал 2018 жылдан бастап жаңа әліпбиді үйрететін мамандарды және орта мектептерге арналған оқулықтарды дайындауға кірісуіміз қажет. Президенттің айтуынша, 2018 жылдан бастап, жаңа әліпбиді оқытатын мамандар мен орта мектептерге арналған оқулықтарды дайындау керек. 2025 жылға қарай Қазақстанда латын әліпбиіне көшу жаппай орын алуы тиіс. Негізгі мақсатымыз — қазақ елін бір ортақ тілге келтіру. «Ел болам десең, бесігіңді түзе» дегендей, біз ең алғаш ана тілімізден бастауымыз керек. Сіздер тілімізді, дінімізді, бірауыздан қолдап, «Жұмыла көтерген жүк жеңіл» дегендей, бірлесе жұмыс жасауға шақырамын. Мәңгілік елдің, мәңгілік төл әліпбиі болуы тиіс,- деді. Келесі сөз тізгінін «Нұр Отан» партиясы Алматы облыстық филиалы төрағасының бірінші орынбасары Ғалиасқар Төлендіұлы Сарыбаев алып, латын әліпбиі туралы әртүрлі пікірлер айтылғанымен  қазақ еліне жасалып жатқан жақсылық екенін,  бұл мәселе осыдан 5 жыл бұрын көтерілгенін, содан бері санамызда «ерте ме, кеш пе, еліміз латын әліпбиіне көшеді, соған дайындала беруіміз керек» деген салмақты ой сақталып келгенін, бүгін сол үкілі үміт сәулесінің куәсі болып отырғанымызды, бұл жазу — елдігіміз бен егемендігімізді айқындайтын, халықтың сауаттылығын танытатын көрсеткіш екенін тілге тиек етіп, латын әліпбиі бұрын тарихымызда 10 жылдай уақыт салтанат құрғанын, сол кезде біз көптеген елге, жерге танылғандығымызды атап өтті. Ал қазіргідей қуатты мемлекетте өмір сүріп жатқан кезеңде біз халық болып бұл жазуды қолдап алып кетпесек, өркениетті елдердің қатарына ілесе алмайтынымызды айтты.

Аудан әкімінің орынбасары Қожахметов Серікбай Бәкенұлы:

— Елбасының мақаласында көтерілген латын әліпбиіне көшу мәселесі өте өзекті, әрі орынды. Біз ендігі кезекте осы мақсатқа жету үшін не істеу керектігін ойлануымыз қажет. Себебі, латын жазуына көшеміз деп айта салу оңай, ал оны жүзеге асыру үшін үлкен шараларды қолға алуымыз керек. Мазмұнды оқулықтар мен әдебиеттің барлығын 100 пайыз сауатты етіп аударып шығу қажет. Бүгінде әлемнің әр түкпірінде 5 миллионға жуық қазақ тұрады. Оның 80 пайызы латын әліпбиін қолданады. Демек, біз болашақта латын әліпбиіне көшсек, сол қандастарымызбен жақындаса түсеміз. Түсіне білген адам үшін мұның да маңызы зор,- деді.

Дидар ДИХАНБАЕВ